Mayornan di tur alumno di Colegio Arubano tambe 100% tras di Rector

President di SVOA a nenga di bay ricibi carta

ORANJESTAD (AAN): Mayornan a pidi pa President di Directiva di SVOA ta presente Diabierna mainta 7:30 am ora cu nan ta bay lesa un carta dirigi na nan.  Pero e President y otronan di Directiva di SVOA a nenga di ta presente pa acepta e carta.

   E ora dilanti tur docente, demas mayor, alumnonan, y tambe prensa, nan a lesa e carta.

   Despues di esaki, nan a acudi na e oficina di SVOA cu ta situa den Hal di Entrada di Colegio Arubano pa entrega e carta.  Un mayor a yega y a bati, y bati, y bati.  Pero esnan di SVOA na un forma hopi muchachada a nenga di habri porta pa ricibi e carta.

   Ta esaki ta e tipo di hendenan cu Obispado di Willemstad ta pone pa ta ehemplo pa hobennan y pa fortifica enseñanza na Aruba?

   Despues a dicidi di schuif e carta bao di e porta di oficina di SVOA.  Pero esnan paden no a ni preocupa pa hala e carta bay paden.

   Mayornan e ora a acudi na e Bufete di Abogadonan Wix & Zeppenfeldt cu si a firma pa ricibi e carta.

   E carta fuerte: Den e carta, e mayornan a expresa nan malcontento pa e situacion inaceptable cu a presenta Diamars 18 di Januari 2022 na Colegio Arubano, y cu a trece como consecuencia cu awor e alumnonan a wordo stroba di tuma nan CP y Examennan di scol.

   Mayornan a confirma cu nan a ricibi un memo di SVOA unda ta wordo bisa cu tur proefwerk y examen di school ta wordo cambia pa fecha 26, 27, y 28 di Januari 2022.  Aki ta wordo duna tambe cu tin motibo valido pa suspension di e Rector, pero e mayornan mes tin di keda den scuridad pa sa si e motibo of motibonan ta asina valido pa bay stroba CP-week y SE-week asina hopi.

   Principalmente awor cu ta saliendo na cla, cu tanto alumnonan, docentenan, y Sindicato Simar ta 100% tras di e Rector, y cu e Rector ey tambe a busca un abogado cu ta bisando prensa cla y raspa cu e Rector a haci nada malo.

   Tin di keda cla aki, cu awor e mayornan tampoco no tin confianza mas den Directiva di SVOA, tampoco e decision di cambia fecha di CP-week y SE-week cu un siman, sin cu a consulta cu e docentenan envolvi, cu ta mustra di ta para tras di e Rector di Scol, pues cu nan lo no por a duna ningun opinion riba e fechanan nobo aki.  Mester keda cla y raspa cu solamente si e docentenan, cu ta esnan cu conoce e materia, y e alumnonan ta di acuerdo cu e fechanan nobo, e ora numa e mayornan tambe por bay di acuerdo cu esey.

   Mayornan ta lamenta hopi cu den ultimo dos añanan cu SVOA a haci asina hopi promesa cu e yegada di e Directiva nobo lo bay tin un mehoramento di e ambiente di les, y cu lo bin trankilidad bek den cuerpo di docentenan, entre docentenan, y tambe mayornan y directiva di scol.  Lamentablemente nada di esey a resulta di ta berdad, y esey nan tur a mira con e asunto aki a escala den ultimo dianan.

   Via di e carta aki, e mayornan kier informa SVOA cu nan como representante di tatanan di famia, nan ta uni na e Docente, na Rector, y na Simar pa exigi nan demanda pa trece bek un ambiente safe di duna les lo mas pronto posible, y yega na un decision bon pensa pa cu e CP y SE perdi.

   (1) Si acaso sali na cla cu Diaranson 26 di Januari venidero no tin ningun motibo valido por wordo treci dilanti, e ora mayornan ta exigi pa e suspension di e Rector ta wordo lanta inmediatamente pa asina sigui cu su funcionnan na Colegio Arubano.

   (2) Pa evita cu e comportacion cu nan a mira riba Social Media, esta cu e trankilidad, seguridad, y capacidad di concentracion di e alumnonan lo no wordo stroba riba dianan di CP y SE, e ora ta roga Directiva di henter SVOA pa nan no ta presente na Colegio Arubano.

   E mayornan ta papia aki di un berguenza absoluto, debi cu loke a socede ultimo dianan a duna un imagen hopi robez di e normanan di comportacion cu ta asina halto na Colegio Arubano, e asina yama maneho di ‘zero-tolerance’ pa cu ‘bullying’.

   E alumnonan a pasa den 2 aña di presion di Covid, cu perdemento di les, perdida di concentracion, y problemanan sicologico.  Mayornan kier mira resultado di prioridadnan hopi diferente di e directiva di Colegio Arubano, compara cu loke ta pasando aworaki.

   E carta di mayornan ta adverti SVOA, cu si e derecho pa enseñanza ta sigui wordo kita, e ora ta keda e mayornan nada otro pa cuminza tuma pasonan legal.