Wever-Croes: Ta adapta maneho di Covid-19 na Aruba --- *Residentenan full vacuna no mester test ora di drenta Aruba
ORANJESTAD (AAN): Prome Minister Evelyn Wever-Croes hunto cu Crisis Team a tene un rueda di prensa diabierna atardi unda a trece informacion relaciona cu e cambio di maneho di Covid-19 na Aruba.
E mandatario a laga sa cu tin cambionan cu ta bay drenta na lugar dialuna awor 24 di Januari. E casonan activo cada dia ta bahando y esaki ta trece cu ne un desaroyo positivo.
E cifranan actual ta duna optimismo, a remarca y cu speransa cu ta bayendo den e direccion di mehoracion di domina y maneha e pandemia locual tambe ta permiti flexibilisa e medidanan cu a bin ta implementa.
Gobierno y Crisis Team ta trahando riba un strategia di salida y aworaki caba ta cuminsa implementa e prome pasonan mirando cu e desaroyo di omicron ta permiti haci esaki, Wever-Croes a splica.
Ta mira tambe cu turismo tin mester di ayudo y pesey a haci e flexibilisacion aworaki.
E luna a aki a wordo afecta door di e desaroyo di omicron y e categoria 4 cu Merca a hinca Aruba tambe a hunga un rol, a agrega.
E cambionan cu a wordo introduci ta e siguientenan:
DEPORTE
For di diabierna 21 di Januari, e eventonan deportivo por tin publico. Pafo te na un maximo di 150 hende y paden te na un maximo di 90 persona.
Esaki ta un cambio cu ta bay drenta den e Ministeriele Regeling di Dialuna 24 di Januari, pero a palabra cu e fin di siman aki caba lo tolera esaki y e organisacionnan a wordo informa tambe di esey.
CUARENTENA
- Si un persona den famia ta haya Covid, e ora si abo (un adulto 18 bay ariba) ta completamente vacuna (3 dosis di e vacuna) bo no mester bay den cuarentena mas.
Den e caso di muchanan (12 cu 17 aña), si nan tin e dos dosis, ya cu e booster pa nan ainda no ta disponibel, nan tampoco mester bay den cuarentena si un persona den nan cas of cu nan tabata tin contacto sali positivo.
Den e caso di e vacuna Johnson & Johnson, no ta tres dosis, sino dos dosis of un combinacion di un J&J y un Pfizer.
- Un otro caso unda no mester bay den cuarentena ta si bo a haya Covid-19 caba recientemente (den e ultimo 4 simannan).
Pesey ta recomenda e booster pa asina bo ta mihor protehi pa asina e economia por sigui desaroya y pa e doñonan di trabao tampoco haya tanto interupcion di servicio pa motibo cu e empleadonan ta malo cu Covid of mester bay den cuarentena pa motibo di famia, e mandatario a indica.
ENTRADA DI RESIDENTENAN
Premier Wever-Croes a duna di conoce tambe cu e residentenan cu ta bin di viahe for di cualkier pais, entrante dialuna, si bo ta completamente vacuna (tres dosis) y bo ta bin Aruba bek no mester di haci test. Den e caso di e muchanan ta dos vacuna.
