Mayoria hende na Job Fair tabata desea trabao den Casino

ORANJESTAD (AAN): Manera DIARIO a mustra caba den otro articulo, un total di 1.000 persona a acudi tanto Diahuebs y Diabierna pa e Job Fair organiza pa Windcreek

Hospitality na Aruba.

   Diego Lemasson kende ta Director F&B pa Windcreek Hospitality, a mustra cu nan a keda contento cu e Job Fair cu nan a tene den siman cu a caba aki, na Playa.  El a splica cu Windcreek Hospitality tin como 50 puesto di trabao habri, y mayoria di e Departamento ta reclutando.  Tin hopi necesidad pa trabao den Food & Beverage, den Kitchen, Service, Housekeeping, Frontdesk, Spa, y bastante den Casino.

    El a nota cu den e Jobfair di e 2 dianan aki, mayoria di hende cu a bay aplica pa trabao tabata buscando un puesto den Casino.  Hende ta hopi interesa pa trha y conoce mas e mundo di Casino.

   Esaki ta algo cu pa hopi decada caba ta algo notable na e isla, esta e atraccion pa traha den e mundo di gambling.  E ta un trabao dinamico, unda e trahador ta representable cu uniform y cu reglanan hopi estricto.