ORANJESTAD (AAN): Pueblo ta puntra tocante esnan no residente cu ta resulta positivo ora di publica e cifranan di Aruba. Relaciona cu esaki, Prome Minister Evelyn Wever-Croes a indica
cu ta trata di turistanan ora cu nan ta prepara pa bay bek nan pais y cu ta resulta positivo pa Covid-19 ora di test.
A laga cu ainda tin algun turista cu ora di drenta Aruba nan por bin sin test. Esaki ta turistanan di paisnan unda no tin risico halto ni hopi halto. Colombia, por ehempel, ta un pais asina, a bisa.
E turistanan aki por yega Aruba sin un test previo y test akinan. Si nan ta wordo detecta positivo nan ta wordo poni den e estadisticanan diario di Departamento di Salud.
E turistanan di Merca, por ehempel, cu tin cu test prome cu bay Merca bek, si nan ta resulta positivo prome cu nan viaha, nan tin cu keda atras.
Pa loke ta turista crusero, e mandatario a splica, si tin hendenan positivo riba crusero, nan no por baha mes. E grupo aki no ta conta den e estadisticanan di Aruba.
Tin protocolnan cera cu e cruseronan cu tin cierto drempelnan cu un bes c'un crusero tin mas di 1% di si crew cu ta positivo, e barco ni por drenta Aruba. Esey a pasa tambe cu un par du crusero, Premier Wever-Croes a duna di conoce.
