ORANJESTAD (AAN) – Distefano Wernet, miembro di e directiva di Fundacion Rancho, a expresa den conferencia di prensa na unda a introduci e proyecto “Strategic Capacity Building Plan 2022-2026”, cu e diahuebs aki tabata un dia hopi importante pa e fundacion.
El a bisa cu e proyecto cu nan ta bay desaroya por compare cu resolucionnan di Aña Nobo, unda cu e fundacion a bin cu su plan strategico di “capacity building” cu cual nan ta bay traha pa medio di nan vision y mision, pa e periodo 2022-2026, y den e pakete completo ta draai cultura.
Distefano a subraya cu cultura ta hopi importante, y den e definicion di Unesco por papia di cultura, no solamente den arte, literatura, etc., pero e ta bay hopi mas amplio manera nos manera di biba, y specialmente den e temporada extraordinario cu pueblo di Aruba ta aden.
“Nos tin cu evalua y pensa di nobo nos manera di biba, nos manera di traha, etc., y con nos ta deal cu otro. Y, Fundacion Rancho su enfoke ta cultura, pasobra cultura tin relacion cu economia, educacion, perseverancia, partnership, colaboracion, y tambe nos kier hinca nos tur aden. Inclusion ta bisa cu no por laga ningun hende keda afo. Y, den nos mision cu vision, e fortaleza ta cu Rancho ta e curazon di Playa. Y na caminda pa e celebracion di 200 aña di Playa, pa traha un bon plan y logra e metanan, mester di profesionalnan pa yuda bo y pesey nos ta aprecia enormemente cu Cornerstone Economics, señora Lay, a yuda nos cu e rapport profesional aki, y banda di esey nos ta hopi agradecido na Cede Aruba hunto cu Samenwerkende Fondsen di Hulanda cu a pone un suma disponible. Pasobra bo tin un bon idea y soña, pero na final di dia placa tambe ta conta, cu nos por a logra unda cu nos ta awe. Nos kier haci un yamada na pueblo di Aruba, pa e aña aki y e periodo venidero pa sostene Fundacion Rancho, na progreso y bienestar di Aruba, pasobra nos so no por hacie. Nos ta un catalizado pa cambio, y nos ta kere den Playa, y nos ta kere den un miho hende, un miho bida, y un miho mundo pa medio di cultura, anto Fundacion Rancho tey, pa yuda den esey!” Wernet a señala.
