E centro di salud di Aruba ta entrega e prueba awe
ORANJESTAD(AAN)—For di momento cu Raymond Knops a presenta su exigencianan na 2020 pa Aruba por a haya un fiansa despues di e desastre causa pa Covid-19, DIARIO a splica algo a base di nos sistema legal.
E pakete di Knops tabata encera tambe y te awe mester wordo bon bari for di mesa, cu Miembronan di Parlamento di Aruba ta haya un “tik op de vingers” si nan no haci nan trabou manera mester ta.
Si parti solamente for di punto di bista cu Parlamento ta e baluarte di democracia y cu ta pa medio di Parlamento, Pueblo ta goberna, por deduci cu Knops no por a haci e expresion aki.
Si parti for di e punto di bista cu Reino tin e deber pa percura cu Pueblo di Aruba no ta bira victima di abuso di e sistema democratico cu e pais conoce, Knops tabata tin razon di tene na vista loke Parlamento di Aruba a permiti pa socede cu Aruba.
Awe e realidad ta duro pa acepta.
Sinembargo, e peliger cu Pueblo di Aruba ta confronta cu e situacion na hospital, ta duna tur motibo pa habri caminda pa por interveni na momento cu representantenan eligi di Pueblo lubida nan compromiso cu Pueblo y sirbi solamente nan lider y partido politico.
Awe DIARIO y tur cu a lanta para ora resultado di investigacion di Algemene Rekenkamer di e proyectonan Bo Aruba a keda presenta, ta haya razon di a bay contra loke a pasa cu placa di Pueblo, pero pio ainda di e forma cu Parlamento a deshaci di su responsabilidad pa permiti abuso wordo haci no solamente di placa di Pueblo pero pio ainda di e confiansa cu Pueblo a entrega na Parlamento pa defende su bienestar den sentido mas absoluto di palabra.
Si Gobierno faya, Parlamento por manda Gobierno cas. Si Parlamento faya e ta keda den su stul cu tur su gastonan paga.
Gobierno por manda Parlamento cas den e sentido cu Gobierno por dicidi cu e ta disolve Parlamento den situacionnan special.
Den e situacion cu tabata tin durante 2009 pa 2017, Pueblo a ricibi e prueba mas grandi cu por tabata tin, kico ta pasa si Gobierno y Parlamento ta mara na otro.
E cantidad di scandal den gobernacion cu Aruba mester acepta, ta papia pa su mes.
Pio ainda ta e hecho cu Aruba a wordo pusha den estado di bancarota, loke a haci cu te awe y den un futuro basta largo, Aruba mester paga pa medidanan cu mester scapa Aruba.
Pio ta bira awor, manera DIARIO a splica basta tempo pasa, cu bida di e Arubiano ta directamente na peliger debi na e situacion cu a presenta na Hospital.
Interes di kende Parlamento a defende entre 2009 y 2017 na un forma, cu no ta laga lugar na duda?
Ta bou huramento un Miembro di Parlamento ta asumi su poder na nomber di Pueblo. No pasobra cara di e Miembro di Parlamento ta bunita.
E peliger actual na Hospital ta inaceptabel den un democracia y ta exigi intervencion awor di e tercer poder den e Trias Politica, cu ta Husticia pa pone orden den e desastre crea durante 2009 y 2017 den cual a destrui Aruba cu mal gobernacion y speransa falso y peligroso manera sigur e proyecto Citgo di Nicolas Maduro a demostra!
