Palabra ta na Parlamento cu tin un deber enfrente Pueblo
*Cuanto placa mester y cuanto placa tin pa atende cu Hospital?
*Mas gasto pa hospital lo bira finalmente aumento tarifa AZV?
ORANJESTAD(AAN)—Ayera den momento cu DIARIO mester a cuminsa prepara su edicion di awe, informacion a drenta, cu SOGA a anuncia cu lo por termina e proyecto cu companianan y personal local.
Manera por comprende no ta prome bez cu tin problemanan y menasa di e contratista cu no ta termina e trabou.
Loke a pasa ayera si y loke a bini dilanti ta duna tur razon, hunto cu tur problema cu e proyecto aki a conoce for di momento cu el a wordo anuncia, pa Aruba wordo bon informa cuanto placa tin disponibel ainda pa e proyecto aki y kico esaki lo nifica pa Pueblo di Aruba.
Aruba ta cera siman pendiente di informacionnan cu mester drenta sigur di parti di Parlamento cu tin e deber sagrado di informa Pueblo di Aruba kico por pasa y kico e por spera den buskeda di su salud.
Den e temporada di Covid-19 Hospital a duna e prueba grandi di e necesidad cu tin na Aruba.
E hecho cu Ministro Dangui Oduber a percura pa tin un centro di salud den forma di Imsan na San Nicolas sigur ta un alivio grandi den e situacion actual.
Importante awor ta pa duna Pueblo informacion cu ta mustra cuanto placa a wordo inverti den e monstruo cu tin e proyecto di Hospital y causa angustia cerca e Pueblo for di momento cu el a haya su inicio.
Importante ta bira sigur pa Pueblo wordo informa si e tarifanan lo subi si sigui cu e construccion y kico esaki lo nifica pa AZV, cu ta depende di tur dunador di cuido pa duna servicio na e clientenan di AZV, cu obligatoriamente ta henter Aruba.
Na mes momento DIARIO ta urgi pa awor leynan wordo cambia di tal forma cu e Ley di Contabilidad cu ta dicidi con ta gasta placa di Aruba wordo adapta di tal forma cu por tene gobernantenan responsabel pa loke nan haci cu placa di Pueblo y cu por aplica hasta castigo di Prison ora manera den e caso aki, intrankilidad riba salud y bida di Pueblo wordo sembra!
Informacion di e proyecto di su inicio te final mester wordo duna na e Arubiano cu for di momento cu a cuminda cu e proyecto aki, nunca por a drumi trankil.
