E monstruo gubernamental “Bo Aruba” ta menasa bida di Arubiano
*252 Miyon mester a bira 375 Miyon pa un hospital hopi peligroso
ORANJESTAD(AAN)—“Bo Aruba” tabata e parti di e campaña cu Mike Eman y su grupo a hiba pa na 2009 e logra e mayoria di voto na Aruba y a base di e cifranan historico 12-8, goberna Aruba.
“Bo Aruba” tabata basa riba proyectonan den cual no ta inversionista tabata core e riesgo di haci negoshi, pero den cual Gobierno Mike Eman lo a haci uzo di un fondo di 1.6 Biyon di Aruba pa manera el a bisa reanima economia.
Hunto cu e promesa cu e lo baha BBO cu mitar, caminda pa victoria tabata habri pa Gobierno di Mike Eman cu awe mester enfrenta Pueblo di Aruba y splica con e sistema democratico di Aruba a wordo uza pa destrui e bienestar financiero di Aruba, comberti refineria di Aruba den un rehen di Venezuela y manera a resulta awe hasta pone bida di e Arubiano na peliger cu e situacion di Hospital di Aruba.
E controlador oficial di Aruba, Algemene Rekenkamer Aruba a haci su trabou pero su relato oficial di loke a pasa cu e fondo di 1.6 Biyon di Pueblo di Aruba a keda scondi den e lachi di Benny Sevinger cu hunto cu Mike Eman a dicidi riba loke lo a pasa cu e fondo di Pueblo.
For di 2018 DIARIO a bati alarma grandi pa Hospital di Aruba, cu tabata den un situacion sumamente peligroso.
Aki no tabata trata solamente di placa doi Pueblo cu tabata na peliger, pero tambe e salud directo di Pueblo na e centro cu mester ta defensa mayor di salud di Pueblo cu ta hospital.
No tabata tin preparacion debido pa e proyecto, manera a bini dilanti den e rapport cu a trece dilanti con e suma original di 252 Miyon a bira 375 Miyon mientras ainda no por a duna garantia di bienestar di Pueblo.
DIARIO na 2018 a rechasa e forma con a hunga cu diferente entidad di gobierno.
SOGA cu ta di Gobierno pues di Pueblo y basa riba placa di Pueblo, lo a financia e proyecto y lo a huur Hospital na Stichting Ziekenhuis Aruba (SZA) cu tambe ta di Gobierno.
E proyecto tabata asina mal hinca den otro cu a lubida riba esencia di sala di operacion cu a exigi mas placa pa wordo traha.
Realmente e proyecto di Hospital tabata un bofon contra Pueblo di Aruba, cu awe ta wordo presenta cu e noticia cu Hospital no por sigui cu e proyecto pasobra placa a caba.
Esaki ta nifica cu e derecho mas sagrado di Pueblo di Aruba a wordo pone na peliger cu e plan, manera DIARIO a splica for di 2018 y cu Pueblo di Aruba ta biba den un ansiedad total.
For di 2018 DIARIO a insisti pa Ministerio Publico actua y investiga loke a pasa cu placa di Pueblo den e proyectonan di Bo Aruba, cu a wordo ehecuta contra leynan basico cu ta regla con ta gasta placa di Pueblo di Aruba.
Gobierno Mike Eman a deshaci completamente di e Ley di Contabilidad cu ta defende e bienestar financiero di Aruba.
Awe e salud di Pueblo, cu ta central den e bienestar di Aruba, ta motibo di preocupacion grandi ya cu e bom lo a rementa den man di e Gobierno actual cu segun informacionnan mester atende cu un proyecto hospital cu a tranca.
DIARIO a duna inicio na su propio investigacionnan guia pa expertonan cu for di 2018 a mustra cu autoridad mester a start investigacion penal contra e forma cu a viola leynan cu e proyectonan di Bo Aruba, cu a inclui Hospital, cu tabata parti di e desastre cu Gobierno Eman a laga atras na 2017, manera pruebanan ta demostra.
