Maybeline Arends-Croes lo ser honra cu concierto di ‘The Young Voices: The Reunion’

Concierto grandi na November

• E ta invita pueblo pa bay mira con ainda nan ta briya 

ORANJESTAD (AAN): Un show sumamente grandi ta wordo prepara, unda pueblo lo bay rebiba e momentonan agradabel di decada di 1970 y 1980, cu e famoso grupo di cantante hubenil di e epoca ey.  Ta trata aki di e presentacion di “The Young Voices: The Reunion” unda casi tur esnan cu a participa den e grupo musical aki lo subi escenario y canta bek tur e cancionnan cu a haci nan famoso, y alavez haci esaki un homenahe special dedica na e gran maestra Maybeline Arends-Croes.  E tabata e motor tras di e grupo hubenil aki.

   Durante un recien conferencia di prensa na Renaissance Convention Center, por a mira Maybeline Arends-Croes rondona door di e integrantenan di Young Voices, manera Lilian Boekhoudt, Mirugia de Cuba, Sandra Suarez-Croes, y Gina Werleman.

   Maybeline a dirigi palabra tambe, bisando cu e tabata poco emociona di tende asina hopi elogio di e integrantenan, y a splica cu Young Voices tabata un di su miho grupo cu e tabatin.  El a agrega cu semper el a dirigi diferente grupo, y keto bay aworaki e tin su coro Tutti Frutti.

   El a indica cu tempo cu nan tabata presenta na TV na e show di Cocktail Musical di Ronny Marugg (dfm), y Showtime cu Tico Kuiperi (dfm), su grupo di coro tabata demasiado grandi pa studionan di Tele Aruba.  Pues tin di haci e grupo mas chikito, y asina a bin cu e idea pa escoge den e cantante nan cu e tin den Tutti Frutti, esnan cu e ta sinti cu por destaca y cu tin e briyo pa por forma un grupo mas chiquito.

Asina a bin e tarea e ora pa busca e repertorio, y pa busca e acompañamento.  Segun Maybeline, aki ta unda cu Johnny Scharbaay tabata uno kende di chikito a acompaña nan, y ta toca en vivo ora di presenta na TV.

   Young Voices a graba varios biaha tambe na Watapana Recording di Emile Kelkboom, pues ta un grupo cu tabata sinta hunto, y nan tabata busca cancionnan cu nan ta tende ta toca na radio, y asina ta reuni y train na cas di Maybeline.  

   “Ya anto e tabata un placer grandi, y pa mi tambe mi ta hopi orguyoso di nan cu semper nan a keda asina hunto manera un famia grandi, anto ta duel mi cu ya, awo mi casa no tey mas, pero el a stima e grupo tambe ora nan ta train na cas.  Unda cu nan canta, Lito tambe tey,” Maybeline a declara un tiki emocional, referiendo na su casa Lito Arends, dfm.

   “Pero mi cas tabata mescos cu nan cas, anto mi ta corda Lilian Boekhoudt su mama tabata bisa: ‘Lilian, bo ta kere miho bo bay cumpra un matras y bo ta keda drumi cerca Maybelin’ pasobra tabatin momentonan cu nos tin show pa duna, anto mi ta tum’e na serio, y nos ta train duro, nos ta train fuerte p'e, no solamente e cantica, bo ta train e harmonia, pues e formacion di e bosnan, y mi ta duna nan e ehercicio pa e stem y harmonia hunto.”

   Maybeline a subraya su admiracion pa e amistad cu a crece entre e integrantenan di The Young Voices, cu a forma di chikito te awor, cu tin un union cu ta inseparabel.  Un amor grandi ta existi entre e integrantenan di The Young Voices, y nan ta compronde otro.

  “Ami cu mi casa, nos cas tabata nan cas.  Nos tabata trata nan mescos cu ta nos propio yiunan, pues no djis siña nan cantamento, sino siña cu mester tin respet, disciplina,” Maybeline a comenta.  E ta corda con nan tabata yena auto yen di mucha pa bay training, of pa dirigi pa studionan di Tele Aruba, of canta na Hotel.  Recuerdonan ta hopi, sin lubida e Pesebre Bibo cu nan tabata presenta, unda ta sinta traha tur e contenido di e storia di presentacion di Nacemento di Hesus en bibo na Aruba.

   “Pero mi ta agradecido na prome na Todopoderoso, Señor Dios a duna mi e forsa cu el a laga mi cera conoci cu nan tambe cu nan bini den mi caminda, cu mi por a forma nan, y cu te ainda nan ta asina yen di energia, yen di pasion, pasobra awor ta trahando pa selecciona e cancionan, kico por ainda, pasobra natural, hende ta bira mas grandi y e bos lo no yega mesun haltura manera antes, pues mester tene cuenta cu stemnan ta baha, y ta normal,” Maybeline a declara.

   E ta agradecido na Carlos Bislip y Ivan Quandus cu ta haci tur nan esfuerso pa yuda nan, pa traha riba  areglo, pa tin e bon tonada, y nan ainda ta forma un grupo asina solido hunto unda uno ta yuda otro, encurasha otro pa train bon, y tin un aña caba ta haciendo training.

   Maybeline a finaliza bisando: “Mi kier a invita publico presente, e pueblo di Aruba, bini gosa atrobe di The Young Voices cu semper a briya manera e strea riba e escenario, y nan tey pa pueblo di Aruba bini goza di nan atrobe, bay scucha e nan bunita bosnan, cu te ainda ta briya.”

   E show lo ta riba Diadomingo 22 di November 2026 pa 7:00 pm den Renaissance Convention Center, y ya caba ticket ta na benta riba Pay.Aw na un forma facil y safe.