Max Abecia ta empleado di luna di mei 2023 na Hospital

Sorprendi riba dia di nurse y elogia pa su bunita trabou

ORANJESTAD (AAN):  Riba Dia di Enfermeria nurse na departamento di cuido B3, esta Max Abecia no a sospecha net nada y a keda hopi sorpresa ora e la habri porta y su departamento completo compaña pa miembronan di Hunta di Directiva, demas colega y tambe representante di Filipinas sra. Ami Henriquez Mendez. Un sorpresa y reconocemento riba e dia bunita aki cu Max no a spera y emocionnan no por a wordo controla.  

            Colega Max, conoci como ‘the Maxfactor’ of ‘superMax’ ta un tremendo teamplayer. E ta duna bon ehempel y semper ta duna contesta riba tur pregunta. Pues e ta para cla pa tur hende. No solamente pa coleganan, pero tambe pashentnan y nan famia y no lubida e specialistanan cu e ta trata cu hopi respet.

            E ta un persona trankilo cu hopi respet pa su team y esaki ta un sentimento mutuo. E tin bon comprension pa e situacion di su pashentnan y ta haci su maximo esfuerso pa nan sinti nan mes mas comodo cu ta posibel.  E ta yuda unda cu e por semper na beneficio di e calidad di e cuido di pashentnan.

            Ademas, Max ta duna guia na studiantenan y ta controla e ‘voorbehouden handelingen’ di tur enfermero na HOH. E ta un persona creativo y semper ta enfoca pa trece solucion unda cu tin mester. Tambe su talent pa cu computer ta tremendo. Banda di esaki e ta un persona hopi motiva. Riba departamento B3 e ta un e ‘verpleegkundige met coördinerende taken’ (VCT) y ta un miembro activo di e HulpVerlenersTeam. E ta mira e situacion den su totalidad y ta purba di soluciona inmediatamente problemanan cu surgi.

            Max ta un di nos profesionalnan den enfermeria cu hopi dedicacion y pasion pa su trabou, pero tambe hopi humilde. Manera e mes ta bisa ‘e elogio aki no por a sosode sin e team completo’. Ful e team merece di ta empleadonan di luna hunto”. No tin hopi colega manera Max. Hospital ta orguyoso di tur empleado cu ta contribui na eleva e calidad di nos cuido medico na Aruba. Y pa luna di mei, un reconocemento fantastico pa Max riba un dia masha special. Masha pabien Max!