Casi 180 alumno di Abraham de Veerschool a imita un dia di votamento

ORANJESTAD (AAN): Tabata mey-mey di siman pasa, cu e alumnonan di Abraham de Veerschool MAVO na San Nicolas,

a haya chens pa experiencia un parti esencial di democracia di Aruba.

   Asina nan tambe por siña di jong pa vocifera nan opinion y cumpli cu nos democracia door di deposita nan voto. E tabata un eleccion ficticio pero e alumnonan a gosa masha di e experiencia cu nan a haya.

   Cada alumno a haya un Oproepingskaart pa bay na e stemlokaal #68 pa asina vota entre 9:15 am y 10:15 am.  Esaki tabata Diaranson 4 di December.  E stemlokaal tabata na e scol mes.

   Alumnonan a drenta y duna nan Oproepingskaart, hunto cu nan carchi di scol pa identifica nan mes.  Despues nan a bay tras di un hoki pa usa potlood cora pa vota pa e partidonan local cu ta participando.

   E hoki a wordo traha den forma di un recuerdo pa saca selfie tambe cune.  Na final, e docentenan a yuda haci conteo, y e resultado ta como lo siguiente.

   Di e 179 alumnonan cu por a vota, tabatin 168 voto valido.  Pues tabatin 11 voto invalido.

   Partido AVP a haya 77 voto, sigui pa Partido HTC cu 46 voto, Partido MEP cu 20 voto, Partido FUTURO cu 13 voto, y Partido PPA cu 7 voto.

   Partido CURPA a haya 2 voto, Partido Accion21 a haya 1 voto, Partido MAS a haya 1 voto, y Partido RAIZ a haya 1 voto.  Ni Partido LpR y tampoco Partido RED no a haya voto.