ORANJESTAD (AAN): Algun siman pasa a haya sa cu algun compania na Aruba a dicidi di bin cu un maneho masha stricto relaciona cu Covid-19.
E maneho aki, ademas di e medidanan conoci manera tapaboca, distancia, uso di hand sanitizer, distancia fisico, a bin cu e implementacion di vacunacion obligatorio pa tur empleado.
Esaki ta nifica cu e trahadornan ta haya un periodo di tempo (periodo di gracia) pa por tuma nan vacuna y asina cu nan keda cla nan tin cu presenta e certificado di vacunacion na pia di trabao pa asina mustra cu nan ta cumpli cu e rekisito mandatario di ta vacuna.
Awor ta tende cu mas compania na Aruba ta aplicando medidanan relaciona cu nan maneho di Covid-19 y si no ta cumpli cu esaki ta bin cu medidanan disciplinario.
Ta conoci cu por ehempel, gobierno a decreta uso obligatorio di tapaboca. Banda di esaki a haci un remarca cu cada establecimento por bin cu nan propio reglanan pa asina por yuda controla y disminui e contagionan.
Wel, awor esaki ta birando evidente ya cu comercio tambe ta contribuyendo cu Gobierno pa combati Covid-19.
Un di e medidanan ta vacuna obligatorio, pero na esaki ta agrega pa esnan cu no a vacuna, test obligatorio di Covid y den caso di no cumpli esaki por conduci na retiro.
Na paisnan manera Merca por a constata cu tin companianan cu a bin cu e mesun medidanan aki y cu ta pidi esnan cu no kier vacuna pa cada cierto tempo haci e test di Covid-19 y e gastonan di esaki mester sali for di nan propio saco.
Tambe tin companianan cu a hisa e suma di seguro pa e empleadonan no vacuna. Na final, manera por ripara, cada bes mas e costo di no ta vacuna lo cay riba lomba di esnan cu no kier tuma nan vacuna contra Covid-19 y keda sin cumpli lo costa nan tambe nan trabao.
