Gobierno nobo ta keda na 8 ministerio - *MEP lo haya 6 minister y RAIZ 2 minister - *Nombernan ainda no ta conoci
ORANJESTAD (AAN): Gobernador di Aruba, Su Excelencia Alfonso Boekhoudt riba diabierna 27 di augustus a ricibi e acuerdo di gobernacion firma for di señora Evelyn Wever-Croes.
Durante di e ultimo simannan, señora Wever-Croes den su rol como formador a reuni regularmente cu Gobernador Boekhoudt pa asina duna un relato di e progreso y implementacion di e encargo di formacion.
Aparte di entrega di e acuerdo di gobernacion, tambe formador a informa Gobernador Boekhoudt tocante e reparticion di cartera.
Den e gabinete nobo, MEP lo haya seis minister, esta minister di:
- Asunto General, Innovacion, Organisacion Gubernamental, Infrastructura y Planificacion Teritorial, alabes Prome-Minister
- Finansas y Cultura
- Husticia y Asuntonan Social
- Labor y Integracion
- Salud Publico
- Enseñansa y Deporte
RAIZ ta haya dos minister, esta minister di:
- Asunto Economico, Comunicacion y Desaroyo Sostenibel
- Integridad, Naturalesa, Transporte y Cuido di Grandinan
Finalmente formador a haci entrega na Gobernador tambe di e documentonan den cuadro di screening di e ministernan nobo.
Pronto Gobernador lo papia cu formador tocante e resultado di e analisisnan. Despues cu e proceso aki finalisa, lo huramenta e ministernan.
Diabierna atardi laat, Formador hunto cu lider di RAIZ a tene un rueda di prensa unda a confirma e stap aki den loke ta e proceso di Formacion di Gabinete Wever-Croes II.
Potret: © Kabinet Gouverneur Aruba
