ORANJESTAD (AAN): Fundacion Anti Droga Aruba (FADA) ta traha cu diferente organisacion pa asina yuda cu e problematica di droga na Aruba.
Un di e organisacionnan aki ta Fundacion pa Maneho di Adiccion (FMAA). Arthur Comenencia a indica durante un conferencia di prensa cu e rol di FMAA su rol den e parti di adiccion ta e parti unda e cliente a cay caba den e problematica aki.
Locual FMAA ta ofrece den e parti aki ta yudansa na Centro Colorado, ondercuratelestelling banda di KIA y ademas ta duna lezing na diferente scol tocante adiccion.
Ora un hende cay den adiccion semper tin un pero y un pakico y pesey FMAA tin nan psicologonan y psikiatranan cu por duna tratamento den esaki.
Ta trahando strechamente cu KPA y otro instancianan manera Voogdijraad. Nan ta concentra nan trabao riba e guia y pa yuda e persona sali for di e adiccion. Esaki no ta un trabao facil.
Cada hende riba nan mes tin diferente sorto di adiccion. Tin adiccion na droga, alcohol, gaming, pornografia, social media, entre esunnan mas comun, Comenencia a indica.
Conhuntamente cu FADA a forma parti varios biaha di Carrousel pero aworaki ta poniendo mas enfasis riba guia cu lo bay amplia su mes riba 'vrijwilligerbasis' of ingreso boluntario y cu cada adicto cu drenta Centro Colorado lo por sali y duna testimonio riba kico a wordo haci pa nan y kico ta e plannan pa nan.
Arthur Comenencia a laga sa cu tin varios plan, pero nan lo sigui enfoca riba e parti di begeleding, duna e cuido y e servicio pa e persona por sali for di adiccion.
El a laga sa cu e ta contento di e cadena di cuido pa trece un cambio den e mundo di adiccion.
