Mas lihe posibel tin cu trata riba e facilidad den KIA pa atende cu adicto ambulante

ORANJESTAD (AAN): Pa locual ta trata e instituto coreccional riba su mes, esaki ta consisti di diferente departamento den e organisacion.

E compleho di KIA den su totalidad ta den situacion hopi malo na e momentonan aki. Un analisis mas extenso tin cu tuma luga urgente, pa garantisa siguridad di tanto e detenidonan como e personal di KIA.

Minister di Husticia mr. drs. Arthur Dowers tin atencion riba e grupo cu ta riba caya y causando un reto hopi grandi pa e comunidad. Adictonan ambulante cu mester sali for di den comunidad y ubica den un facilidad pa haya tratamento.

Intencion ta pa nan haya tratamento pero tambe limita e risico cu nan ta causa daño den comunidad y na bienestar di hende y nan mes riba caya.

Minister Dowers a indicia cu e accionnan aki lo mester bin den un corto tempo, y mester interveni extensamente den parti di facilidadnan den KIA pa asina garantisa cu por atende cu e grupo aki.

Den pasada e grupo di adicto cu ta bay bao curatela y ta pasa pa e opvang, pero esaki tin cu bay reactiva den forma rapido pa asina garantisa cu por cuminsa reduci e presion cu e grupo aki ta causa den comunidad.

Riba rednan social, media, den pueblo, como tambe den e areanan afecta manera entre otro centro di ciudad, Oranjestad ta sinti y biba e problematica aki diariamente.