Cu proyecto pa lanta Club “The Inner Ink Society”
ORANJESTAD (AAN) – Matutino DIARIO a entrevista Faridi Abdul, ken a sigui un estudio di “Coach di terapia di diario” (Journaling) y e kier invita comunidad pa dia 17 di October, di 5’or y mey pa 6’or y mey, na UNOCA, pa bin haya informacion tocante su proyecto di lanta un Club yama: “The Inner Ink Society”.
E invitacion ta dirigi na hoben for di 15 aña te edad adulto por ta te 60 plus, pa join y bira miembro di “The Inner Ink Society Club”.
Faridi ta splica: “E ta bay ta un Club unda hunto nos ta bay skirbi un diario cu diferente tema cu por motiva nos pa sigui skirbi den diario y plama nos experencianan, sea bunita y agradable of dificil, y expresa e sentimentonan, emocionnan, cu e experencianan aki a causa den nos persona, y traha un programa”.
Kico a inspira Faridi pa bin cu e idea aki?
“E idea a bin door cu mi a haci mi estudio di Coach Journaling, anto mi kier a haci algo diferente lantando un club. En principio e idea ta pa siña skirbi hunto den un diario y expresa nos mes y comparti nos experiencia”.
Y con lo scoge e temanan y con lo traha programa?
“E temanan mi kier pa e miembronan mes, conhuntamente, segun e interes cu nan tin den un tema y cuanto biaha nan kier reuni, mi ta traha un programa”.
Ki meta kier logra cu e Club?
“E meta ta pa e participantenan custumbra pa haci journaling, pa nan haci’e un habito y mi ta kere cu hunto lo ta mas leuk pa comparti e tema(nan)”.
Como coach, kico bo mes por aporta na e Club?
“Como coach mi por aporta un espacio pa journaling pa e participante por expresa su mes, y describi e momento cu e ta experiencia y cu e kier trece dilanti”.
Individualmente, skibirmento di un diario kico por yuda e persona mes?
“Cu e por aliña su pensamento cu loke e ta expresa na e momento ey, si e ta pasando na den algo bon of no asina bon, e ora ey. Pero un diario tambe ta wordo uza pa planea soñonan cu bo tin y cu bo kier realiza den futuro, bo ta skirbi nan y nan por manifesta na un of otro manera. Tambe ta algo bunita pa sinta den famia skirbi un diario, of como pareha, por ehempel con nan ta comunica cu otro, kico a bay fout, kico a bay bon, anto despues nan ta reflexiona y bay over na dje”.
Kico Faridi lo trece dilanti den e encuentro na UNOCA?
“Na UNOCA mi ta bay splica kico ta journaling, kico ta e Club ‘The Inner Ink Society’ y duna informacion di cuanto e costo ta, pasobra e tin costo mara pa ingresa den e club”.
