ORANJESTAD (AAN): Diamars, 10 di juni, mas di 560 mucha di scol di enseñansa primario na Aruba
lo participa den un gran concierto di fin di aña, organiza pa Leerorkest Aruba. E evento lo tuma luga entre 8:30 AM y 11:30 AM den Renaissance Convention Center na Oranjestad, y ta priminti pa ta un celebracion unico di musica, talento y comunidad.
Leerorkest Aruba ta un programa di musica cu un fin social y educativo, inspira pa e iniciativa Dutct Leerorkest. Desde su fundacion na 2019, e programa ta duna na e hobennan e oportunidad pa siña toca instrumento musical durante e orario di scol, promove disciplina, trabou den grupo y creatividad. E programa actualmente ta activo den cuater scol: Prinses Amalia School, Colegio Laura Wernet Paskel, St. Paulus School y Graf von Zinzendorf School.
Durante te temporada di scol, e muchanan ta traha duro bou guia di un team di maestronan di musica cu pasion y profesionalismo. E concierto ta e resultado di lunanan di ensayo y compromiso y pa hopi mucha lo ta e prome biaha cu nan ta toca pa publico.
Ademas 60 miembro di e After School Orkest di Leerorkest Aruba tambe lo subi riba escenario. E grupo aki ta haci ensayo semanal den diferente distrito, inclui San Nicolas, Santa Cruz y Dakota.
E programa di concierto ta inclui piesanan popular manera Appel Cora, Dance Monkey, Three Little Birds, Believer, Seven Nation Army i We Will Rock You, cu un presentacion special di Suave cu un bishita sorpresa.
E concierto lo wordo dirigi pa Wouter Hakhoff, un director cu hopi aña di experiencia cu Leerorkest Nederland, cu a bini specialmente di Hulanda pa yuda lidera e evento.
Ademas, Leerorkest Aruba ta produci les di musica online, completamente gratuito, pa tur nivel di scol primario (di kleuterschool te 6de klas).
E lesnan aki ta wordo emiti durante ora di scol via TeleAruba y ta disponibel tambe via www.leerorkestaruba.org. Nan ta ofrece educacion musical general, cu ta inclui ritmo, lesamento di nota, elementonan di cultura Arubano y cantamento interactivo.
E organisacion ta gradici henter su team di maestronan, e muchanan, personal di scol, mayornan, y tur partner cu ta haci e programa posibel.
