Mas di 450 mucha di scol a haya oportunidad pa encontra cu superheroenan di bida real

Liberato Hoek tocante Super Heroes Parade 2025

ORANJESTAD (AAN): Diahuebs mainta a tuma luga e Super Heroes Parade 2025 den conexion cu Dia Internacional di Derecho di Mucha. Señor Liberato Hoek, Hefe di Ambulans, a conta DIARIO mas detaye tocante e proyecto bunita aki, cu a inicia na aña 2018 cu un iniciativa conhunto di Cuerpo Policial, Departamento di Brandweer y Ambulans. Awe, hopi otro departamento y compania a uni na e parada di superheroe, entre nan Crisis Management Office (CMO), Warda Nos Costa y Arumil. Boluntarionan di diferente area tambe a duna man pa logra un otro edicion exitoso di e parada.

  Segun señor Hoek, e preparacionnan pa e evento a cuminsa ya for di october, cu e meta pa brinda un experiencia special y significativo pa tur mucha riba nan dia. E grupo a bishita un cantidad grandi di scol y a logra yega na mas di 450 mucha, cu ta refleha e entusiasmo cu e comunidad escolar a mustra. Señor Hoek a expresa su gratitud profundo na tur scol cu a habri nan porta y cu a duna e oportunidad na e muchanan pa tin un encuentro directo cu nan “super heroenan” local.

   E muchanan a bira hopi contento ora nan a mira e uniformnan, vehiculonan special y heroe di bida real. Pa hopi di nan, tabata un dia di inspiracion. Señor Hoek a destaca cu e mensahe principal ta pa recorda tur mucha na Aruba cu den nos departamento y servicionan vital tin hende real—super heroenan di bida real—cu ta traha sin descanso pa nan siguridad y bienestar. E speransa ta cu esaki no solamente inspira confiansa, pero tambe motiva e muchanan mes pa, den futuro, pensa di bira parti di un di e trabounan nobel aki di proteha y sirbi nos pais.