Fase 1B di expansion di Aeropuerto a cuminza

Proyecto Gateway 2030:

ORANJESTAD (AAN): E siguiente Fase di e proyecto pa transforma Aeropuerto di Aruba a start.  Aruba Airport Authority N.V. (AAA) a destaca e trabaonan andando dentro di e proyecto transformativo Gateway 2030, cu e avance di e trabaonan di Fase 1B. E logro nobo aki ta representa un paso significante pa redefini e experiencia di biahe na Aeropuerto Internacional Reina Beatrix (AUA), garantisando cu Aruba ta keda un destinacion di clase mundial construi pa e biahero di awendia y cla pa e necesidadnan di mañan.

   Futuro: Gateway 2030 ta un proyecto di transformacion di aeropuerto di varios aña diseña pa expande, modernisa y eleva e porta principal di Aruba. E enfoke di Gateway 2030 ta pa crea un experiencia di biahe sin problema y agradabel pa cada pasahero. 

   Cu e finalisacion di Fase 1A den luna di April 2025, e biaheronan awo ta disfruta di un terminal di check-in pa Merca cu ta espacioso y tecnologicamente avansa, diseña pa eficiencia y sostenibilidad. Respalda pa un sistema di “baggage handling” di ultimo generacion capaz di procesa te cu 2.000 maleta pa ora. 

   Awor Fase 1B:  Cu comienzo di Fase 1B, e pasaheronan y partnernan lo cuminsa mira e aeropuerto expande mas ainda. E fase nobo aki ta enfoca riba mehora e experiencia di salida a traves di:  (*) Tres gate nobo ekipa cu tres “boarding bridges” (yama tambe “jet bridge” y tambe ‘slurf’). (*) Tres “bus gates” nobo. (*) Sala di espera expandi pa mas comodidad y capacidad. (*) Mehoracion di fluho operacional y circulacion di pasahero 

    E expansion ta cuminsa na Gate 8 (Edificio D), caminda construccion ta avansando rapidamente. Pronto un “connecting bridge” lo conecta edificio D cu edificio E, cu lo contene tres gate nobo. Ya caba ta lantando y bashando muraya, cu un structura nobo di hero; señalnan visibel di e evolucion di e aeropuerto. 

    CEO interino, James Fazio a enfatisa e importancia di e siguiente fase aki den e vision a largo plaso di e aeropuerto: “Fase 1B ta refleha nos compromiso pa entrega un experiencia di aeropuerto cu ta ofrece un standard di clase mundial mientras ta brasa e hospitalidad cu ta describi Aruba. Cada stap cu nos tuma bou di Gateway 2030 ta diseña pa mehora comodidad, eficiencia y e experiencia en general di nos pasaheronan. Nos ta gradici e pasenshi y e sosten di nos comunidad mientras cu nos ta sigui construi un aeropuerto cu tur Rubiano por ta orguyoso di dje.”

   E ta inclui: Preparacion pa Fase 2 ta andando caba y ta programa pa cuminsa mesora despues di e finalisacion di Fase 1B. Fase 2 lo inclui:  (*) Un sala di check-in pa vuelonan cu ta bayendo pa Merca y pa e vuelonan cu no ta Mericano.  (*) Area nobo pa Migracion, Security y U.S. Customs and Border Protection (USCBP).  (*) Un area comercial y plasa di cuminda y bebida nobo.

   AAA ta gradici tur biahero, trahado y partner pa e pashenshi continuo y e sosten durante e expansion importante aki. Cu e innovacion, eficiencia y hospitalidad como pilarnan fundamental, Aeropuerto di Aruba ta mantene su compromiso di mehora e experiencia den aeropuerto y di sigui ta Aruba su porta pa felicidad.