Mas di 300 studiante a asisti di cuater ‘Opendag’ na Hospital

Hoben cu aspiracion den cuido medico inspira

ORANJESTAD (AAN): Pa di cuater aña consecutivo, HOH Academy di Horacio Oduber Hospital (HOH) a organiza un “open dag” cu meta pa inspira y informa hobennan studiante riba e diferente oportunidadnan den mundo di cuido.

   Durante e “open dag”, mas cu 300 studiante a bishita e evento, unda nan a haya e oportunidad pa papia directamente cu profesionalnan di diferente departamento, haci pregunta y conoce di cerca e diferente funcionnan cu tin den nos Hospital. Un mainta exitoso cu bishita tambe di nos Minister di Salubridad, Asunto Social, Cuido di Adulto Mayor y maneho di Adiccion señora Mervin Wyatt- Ras cu tambe tabata emociona pa mira tanto interes di nos hobennan.

   Segun Jacco Vroegop, presidente di Hunta di Directiva na HOH, un cantidad grandi di colega a participa pa conta con e trabao diario ta y con gratificante e ta pa forma parti di un organizacion manera HOH. Hopi di e hobennan cu tin interes pa traha den hospital tabata presente, mustrando entusiasmo pa sa y siña mas. Danki sigur na e nursenan, team di oncologia, radiologia, departamento di mucha, recurso humano y tambe HOH Academy, cu banda di organiza a duna demostracion di CPR. Tambe danki na e team cu a brinda e tour den hospital manera sala di operacion, radiologia, dialyse, functiekamer, revalidatie y departamento di mucha.

  E evento a haya un acogida positivo den comunidad, cu un interes visibel di parti di e hobennan pa orienta nan futuro profesional. “Mi ta spera cu hopi di esnan cu a bishita nos tambe dicidi pa bin traha cerca nso, pa hospital, pa publico y pa Aruba,” Vroegop di HOH a expresa.

   Un di e studiantenan cu a bishita nan, Lianne Ras, a comparti cu tin interes den area medico manera radiologia, hematologia of patologia. el a bishita e “open dag” pa haya un miho idea di cua direccion ta atrae mas. Su decano di scol a informa’e di e evento, y el a decidi pa asisti hunto cu su famia y amigonan. Segun Lianne, e tabata hopi emociona pa conoce mas di e diferente departamentonan, specialmente e sala di operacion.

   Gerencia di Hospital ta desea di gradici HOH Academy y tambe tur colega cu a contribui na e dia aki, brindando informacion cu hopi entusiasmo y dedicacion. Nan compromiso ta mustra claramente cu HOH semper t’ey pa su pashentnan pero tambe pa guia y apoya nos hobennan den nan desaroyo y futuro profesional. HOH ta mira cu satisfaccion con e evento a logra conecta cu e futuro profesionalnan y lo continua cu e iniciativa aki den futuro.