Segun Director di DRH, señora Omaira Lares:
ORANJESTAD (AAN): Director di DRH, señora Omaira Lares, den un entrevista cu DIARIO, a duna di conoce cu lo habri hopi vacatura den Departamentonan di Gobierno despues cu ambtenaarnan baha cu Vut. El a remarca cu no por yena e vacaturanan aki externamente debi cu e placa pa paga vut, ta wordo kita for di presupuesto di e departamento.
Sinembargo, el a remarca, cu actualmente tin mas di 200 vacutura pa yena y cu awo tin placa pa paga hende. Pero, e departamentonan no ta busca mas hende pa diferente motibo. Segun e, por ta un motibo ta pasobra no tin luga pa mas hende sinta. Y tambe, por ta cu DRH mes ta slow pa hacie pasobra nan tampoco tin personal pa haci e trabou.
El a agrega cu pa e proximo añanan, entre 200 pa 300 empleado publico lo baha cu pensioen. Y por uza e placanan aki tambe pa busca hende pa traha den e aparato gubernamental na unda cu por paga dos of tres hende na un schalering (schaal 6) mas abou cu a placa di salario di un pensionado cu a retira (schaal 16). Di e manera aki, señora Lares a expresa, DRH ta busca oportunidadnan pa incentiva ciudadanonan mas jong pa traha den Gobierno y tambe pa promove e mas jongnan den servicio pa move bay mas halto den nan funcion.
“DRH ta tumando diferente medida pa e vacaturanan aki wordo ocupa. Tin situacionnan hopi dificil na algun departamento cu tin por vacaturanan cu no ta esnan ehecutivo cu ta haci cu e departamento ta funciona cu deficiencia. DRH ta na haltura di esaki y ta atendiendo esaki proactivamente”, señora Lares a expresa.
