Mas cu setenta Baki di Desperdicio colecta durante Baki den Bario na Santa Cruz

ORANJESTAD (AAN): Diasabra ultimo a tuma luga e di dos edicion di Baki den Bario na Santa Cruz.

Baki den Bario, cu ta forma parti di campaña nacional ‘Limpi Limpi’, ta un evento unda ta pone baki di desperdicio na diferente districtonan rond di Aruba.

  E meta di e evento aki ta pa conscientisa nos poblacion riba separacion di desperdicio y e importancia di esaki. Pues ora di separa desperdicio, nos ta yuda e procesamento di reciclahe cana mas eficiente y alavez, ta percura pa menos contaminacion den nos medio ambiente.

  Diasabra ultimo entre 7‘or pa 11‘or di mainta un cantidad grandi di persona y segun nos calculacionnan alrededor di 500 vehiculo, a bin haci uzo di e oportunidad pa trece desperdicio pa procesamento. A logra colecta alrededor di 70 baki di desperdicio separa cual entre nan desperdicio di construccion, metal, e-waste, greenwaste, bulkwaste, taira y hasta carton.

    Ministerio di Naturalesa ta sumamente contento cu e cantidad significante di desperdicio cu a ser colecta y awor lo por worde procesa debidamente. Esaki ta desperdicio di cual un gran parti por a termina den nos naturalesa.

   E recepcion excepcional di Baki den Bario ta un muestra cu nos comunidad ta dispuesto di adopta practicanan sostenibel. Separacion di desperdicio ta un concepto relativamente nobo den nos comunidad y ta algo cu lo tuma cambio di mentalidad pa por implementa structuralmente. 

   Tambe un recordatorio cu durante cada evento di Baki den Bario lo tin un stand di FPNC (Fundacion Pa Nos Comunidad) unda cu lo acepta articulonan den bon estado cu por haya di dos uzo cerca un doño nobo. Articulonan acepta ta, entre otro, muebles, paña y co’i hunga.

   Adicionalmente, Serlimar lo tin un stand unda su clientenan por bin regla nan cuenta di pago y solicita transportacion di nan desperdicio den caso cu no por logra trece. E servicio di transportacion di desperdicio, tambe ta telefonicamente.