Mas cu mil hende a bay check e expo di Historia di Parokia di Noord

ORANJESTAD (AAN): A reina un tremendo ambiente na Noord y na Playa cu bishitantenan entusiasma riba Dia di Himno y Bandera pa haya mas di historia di Noord, Aruba y Caribe.

Mas cu mil persona a sera conoci cu e exposicionnan Historia di Parokia di Noord y Caribbean Ties den e Convento di Imeldahof. MANA (Museo Arqueologico Nacional Aruba) na Playa a ricibi mas cu 400 bishitante.

   E caracter di e edificionan monumental na Noord y Playa a capta atencion di publico. Tambe e hardinnan precioso na tur dos localidad a encanta bishitantenan. E obranan di artistanan Belinda de Veer y Sjoerd Maartens tabata un revelacion pa e espectadornan. E guia personal di Belinda de Veer a trasmiti con el a procesa su retonan di bida den arte.

   E produccion audiovisual y collages di potretnan di di Sjoerd Martens a conduci na reconocimento y preguntanan relaciona cu proteccion y futuro di herencia cultural y naturalesa.

   E exposicion Historia di Noord a brinda un oportunidad pa storianan di seournan di Bethania ser conta y tambe pa recorda sucesonan signicativo como mucha di scol den siglo pasa. Caribbean Ties a trece informacion desconoci di e relacion entre e islanan di Caribe prome y despues di yegada di colonisadornan den e region aki. Tambe turistanan a haya caminda pa e Convento di Noord y a goza di un dia ameno hunto cu nos hendenan.

   E colaboracion entre Fundacion Kapel di Betania y MANA a demostra cu por logra un alcance (mas) grandi. E espacionan di Convento di Imeldahof lo conocce den e lunanan cu ta bin mas actividad den cua bishitantenan por experencia mas aspecto di cultura di Aruba.

   Exposicionnan na MANA ta habri di dialuna pa diabierna di 9’or di mainta pa 5’or di atardi. Convento di Imeldahof ta habri pa publico riba dialuna, diaranzon y diahuebs di 9’or di mainta pa 3’or di merdia. Entrada te ainda ta gratis.