Diasabra ta ‘Purple Day’ como Dia Internacional di concientizacion di Epilepsia

ORANJESTAD (AAN): E asina yama ‘Purple Day’ ta un evento internacional cu e meta pa concientiza comunidad riba epilepsia cu ta wordo teni tur aña riba fecha di 26 Maart.

   E evento aki a cuminza na 2008 na Nova Scotia (Canada) door di Cassidy Megan di 9 aña cu sosten di e organizacion di Epilepsia di Nova Scotia.  Cassidy mes tabata sufri di Epilepsia, y cu e evento aki e kier pa esnan cu tin Epilepsia no kere of sinti cu e ta solitario, pa asina combersa cu otro y haya informacion encuanto Epilepsia.  Di e forma ey por elimina tur mito- y tabunan riba e problema medico aki.

   Na 2009 e organizacion di Epilepsia di Nova Scotia, y esun di New York a uni forza y asina a crea Purple Day International, y a escoge pa e color biña lavender, y pesey ta pidi pa tur hende bisti color biña riba e fecha aki.

   Miyones di hende rond mundo ta sufri di Epilepsia, y 1 di cada 100 hende por haya un atake di Epilepsia den nan bida.  Pesey ta hopi importante pa comunidad wordo concientiza riba loke ta Epilepsia y kico ta nifica pa un persona cu tine.

   Na 2007 e fundacion “Stichting Epilepsie Aruba” (SEA) a wordo lanta cu e meta aki, pasobra e tempo ey no tabata existi ningun fundacion local unda e pashent y su famia por a haya informacion adecuado riba e tereno aki cu tur su consecuencianan.

   Cu yudanza di e.o. Docter y demas personanan activo riba Epilepsia, e Fundacion SEA regularmente a tene charla riba e problema medico aki.  Tambe nan a tene lectura pa e.o. scolnan, crechenan, y organizacionnan social, y cada biaha ta resulta cu comunidad tin necesidad grandi pa informacion debido riba Epilepsia.

   Den e cuadro aki, Fundacion SEA a organiza anualmente (te 2018) evento na Scolnan Preparatorio, unda nan a duna informacion di Epilepsia na e muchanan chikito, y maestronan.  Cada biaha e Ministro di Enseñanza tabata presente y hiba palabra.  Debi na pandemia lamentablemente Fundacion SEA no tabata activo e ultimo dos añanan, pero nan ta prepara pa activa e tareanan di e Fundacion atrobe.

   Corda cu un persona cu Epilepsia por hiba un bida normal, basta e ta na altura kico ta Epilepsia y sigui instruccion di su Docter.  Hopi importante ta tambe pa comunidad dune e sosten necesario pa e no sinti’e su so manera Cassidy Megan a siña nos.

   Informacion por haya semper di e miembronan aki, esta Robert F. Nieuw na 593-5562, Margarita Pourier (592-5806), y Maryla Solognier (562-6492).