Mas cu 300 firma colecta pa lanta comision nobo pa mantencion di Santana di Zeewijk

ORANJESTAD  (AAN): Un señora a colecta mas cu 300 firma den un peticion pa instala un comision nobo pa drecha y haci trabaonan di mantencion na Santana di Zeewijk.

Den un entrevista señora Faith a splica cu e y mas hende ta preocupa pa e estado di e Santana, unda tanto generacion di famia ta dera.

“Tanto aña largo e hendenan aki tabata bay Iglesia y tabata pone placa den e collect di misa, pues nan no merece cu e Santana ta den e estado cu e ta actualmente”, segun Faith.

DIARIO  puntra e señora tocante e comision cu tin y el a bisa cu e comision di 1 of 2 persona no ta funciona.

El a splica cu algun aña atras tabata tin mas hende den e comision pero nan a core bay.

“Un persona cu bon curazon cu tabata traha na Valero alrededor di 5 pa 6 aña pasa a haya 3 saco di cement for di un sponsor, pero ningun hende a bay busca e cement y na dado momento yobida di awa a daña e cement”, segun e señora kende a splica cu tin varios graf kibra y yerba cu ta crece tur caminda.

Faith ta cuestiona cu tin 4 collect na misa, siendo cu e placa no ta wordo uza pa drecha e Santana.

“Nos a manda nos peticion pa e Obispo na Corsow y e no a ni contesta nos pa mas di un luna”.

Nos ta haya esaki un falta di respet, segun Faith.

El a indica cu e kier papia cu pastoor Seco pa wak si por yega na un solucion pa e problema.