Reunion a bay den bon ambiente
ORANJESTAD (AAN): Diabierna utitmo Minister Ursell Arends, kende ta encarga cu transporte, hunto cu su colega Minister Geoffrey Wever di asuntonan economico, a reuni cu un grupo di comerciantenan di caya grandi pa toca e tema di Aruparking.
Manera Minister Arends a duna di conoce caba, entrante januari Aruparking lo cuminsa entensiva su control di parkeo den area di Caya Grandi. Esaki ta trece su preocupacionnan pa comerciante nan den caya. Pa e motibo aki a pidi un reunion cu e mandatario pa asina dialoga, puntra cualkier pregunta of vocifera preocupacionnan.
Durante e encuentro Minister Arends no solamente a reforsa nan deseo pa tin parkeo organisa, pero tambe tabata tin un dialogo habri riba oportunidadnan pa comercio den e area en general.
“Mi ta contento di por a topa e comerciante nan awe hunto cu mi colega Minster Wever”, Minister Arends a cuminsa na bisa. “Nan (comerciantenan) a trece diferente idea dilanti cu sigur nos lo tuma den consideracion. Na final di dia mester wanta e dialogo habri pa asina yega na e miho solucion pa cu parkeo den centro di ciudad.
Minister Wever cu tambe a forma parti e e reunion a tende di e preocupacion cu e comerciantenan tin, y nan input pa cu caya grandi. Minister Wever ta bezig cu proyecto grandi pa cu centro di ciudad pa stimula e volumen di trafico di hende, y drecha e factibilidad comercial pa e area.
En general un reunion sumamente fructifero y den bon ambiente, caminda esfuersonan pa cu parkeo structura, y tambe pa cu desaroyo di centro di ciudad ta demostra di keda esencial pa ambos stakeholders.
