Wendrick Cecilia ta muraya pa sconde berdad financiero crea pa Mike
*Parti di Formacion ta contene impresion falso di realidad di Aruba
*Sin votonan di Wendrick Cecilia awe Mike Eman no por ta Formador
ORANJESTAD(AAN)—“Parti di e relatonan di combersacionnan entorno e formacion di Gobierno nobo di Aruba ta crea e impresion cu tur hende ta di acuerdo cu Aruba tabata tin mester di un lider nobo, pasobra gobierno di Evelyn-Wever Croes a faya.
Esaki ta loke ta bini dilanti di parti di informantenan sumamente preocupa di DIARIO, cu ta mustra cu den e combersacionnan pa yega na un Gobierno nobo, manera semper ta costumber, mayoria di gremionan ta presenta nan opinion cu nan a yega di presenta den pasado, manera necesidad pa mas trahador na Aruba, loke ya ta punto di atencion gubernamental.
Manera ya anuncia, informantenan importante di DIARIO, a cuestiona e forma cu mester a bini eleccionnan prome cu 2025 na Aruba y durante temporada di Dianan di Fiesta y Carnaval.
Informacionnan cu ta alcansa Pueblo actualmente, ta carece di e berdad na cual tanto Gobierno demisario di Evelyn Wever-Croes mester tene su mes como e proximo gobierno, cu lo wordo dirigi dor di Mike Eman cu un historial hopi preocupante como gobernante di Aruba.
Nan ta mustra cu sigur hobennan cu awor ta parti di e mundo politico activo y pasivo di Aruba, no ta wordo informa debidamente pakico Aruba ta den e situacion cu Aruba ta actualmente y pakico Aruba no por uza tur placa di belasting directamente pa asuntonan di Pueblo.
Manera informantenan a trece dilanti, na e momentonan aki tur Gobierno cu sinta mester percura pa 17 porciento di placa cu drenta directamente bay pa paga debe di Mike Eman, cu concientemente a crea un debe pa Aruba paga awe.
Ningun Gobierno di Aruba, eligi dor di Pueblo, por trece cambio den e medidanan cu Hulanda mester a tuma pa evita cu Florin di Aruba ta na peliger serio.
Manera informantenan a trece dilanti, pa eleccion 2024, Mike Eman mester a bolter hasta berdad di politica na Aruba y bay uza Wendrick Cecilia pa crea e impresion cu AVP tin un dirigente nobo, mientras Mike Eman tabata tin mester di un muraya politico pa sconde su tras.
DIARIO den edicionnan anterior, a indica claramente, cu e debe cu awe ta stroba e Arubiano goza di e placa cu maneho di Gobierno Evelyn Wever Croes a produci pa caha di Aruba, cu e persona cu a destrui felicidad di e Arubiano, ta Mike Eman cu a hiba un maneho basa riba creacion di debe pa e pais, cu awe mester wordo paga (manera Mike Eman a declara den pasado) orguyosamente.
Tabata pa motibo di Mike Eman, cu na 2014, Hulanda manera Statuut ta exigi pa bienestar di e Arubiano, a introduci medidanan pisa.
Na e momento Mike Eman a bay sconde na 2017, ora Aruba durante eleccion a expresa su mes contra e maneho di abuso cu Mike Eman a hiba cu placa di belasting di Pueblo, cu awe mester paga belasting pa Aruba no bay bancatora, manera Reino a adverti.
Informantenan ta bisa cu ta un berguenza cu awe Mike Eman ta bisa cu ta placa di Pueblo ta wordo uza pa Gobierno tin suficiente placa pa paga su debenan pero tambe pa traha pa Pueblo, mientras Mike no ta bisa cu ta e ta motibo cu Aruba ta den tanto problema, pasobra el a abusa di e maneho di placa di Pueblo den un tempo cu scandalnan cu propiedad di Pueblo a rementa.
Informacionnan concreto ta indica, cu tin preocupacion serio pa loke e gobernacion nobo di Mike Eman por produci pa Aruba.
A wordo indica cu no ta Mike Eman riba su mes a gana eleccion manera na 2014, pero cu el a uza un “Cara”nobo, cu ta Wendrick Cecilia pa asina haya sosten di hobennan loke a haci cu AVP a gana eleccion.
Mike Eman a sconde tras di un muraya pa berdad no spart den su cara y di un grupito di sostenedor cu a wordo favorece directamente tempo di Mike Eman ora den Corte casonan di corupcion a rementa.
Hopi preocupacion tin na Aruba pa un forma falsifica cu e hecho cu Mike Eman ta formador di Gobierno, ta entrega na Pueblo.
Manera informantenan ta indica sin e votonan di Wendrick Cecilia Mike Eman lo no por tabata formador di un Gobierno mas di Aruba, despues cu historia di Aruba ta duna prueba cu unicamente Covid-19 a supera e forma desastroso cu Mike Eman a atende cu placa di Pueblo di Aruba.
Informacionnan cu ta wordo publica na e momentonan aki, no ta suficiente balancea segun informantenan sumamente preocupa pa e futuro imediato di Aruba na man di Mike Eman cu a perde su lugar di lider den voto durante eleccion y a gana eleccion pa e sosten di e nobato Wendrick Cecilia!
Preocupacion enorme realmente ta reina na Aruba pa loke politica lo trece na 2025, ora ya manera a wordo bisa, Caso Avestruz lo rementa ora porta di prison mester habri pa ricibi tur cu a wordo sentencia a menos cu e caso wordo entrega na Corte Supremo!
