Cada dos siman, como promedio, un lenga ta desaparece
*Lo tin dos charla interesante
ORANJESTAD (AAN): Na aña 1999 UNESCO a dicidi di institui un Dia Internacional di Lenga Materno pa celebra den henter mundo dia 21 di februari di cada aña. UNESCO a institui e dia aki cu e fin di promove diversidad linguistico y enseñansa multilingual y pa enfatisa un conscientisacion mas profundo di e importancia di enseñansa den lenga materno.
E prome biaha cu a celebra e dia aki internacionalmente tabata na aña 2000. Na Aruba a cuminsa celebra Dia Internacional di Lenga Materno na aña 2003 cu un actividad organisa pa UNESCO Aruba, den cual Ramon Todd Dandaré Mag. Ling. a tene un charla den Aula di Universidad di Aruba. Despues di e celebracion ey, cada aña a sigui celebra Dia di Lenga Materno na Aruba.
UNESCO ta kere den importancia di diversidad cultural y linguistico pa sociedadnan sostenibel.
Den cuadro di su mandato na fabor di paz, e ta traha pa preserva e diferencianan di cultura y idioma cu ta fomenta tolerancia di y respet pa demas persona. E sociedadnan multilingual y multicultural ta existi pa medio di nan lenganan, cualnan ta transmiti y preserva conocemento y cultura tradicional di manera sostenibel. Pero, diversidad linguistico cada bes ta mas menasa.
Cada dos siman, como promedio, un lenga ta desaparece, hibando cu ne henter un patrimonio cultural y intelectual. 40% di poblacion mundial no tin acceso na enseñansa na e lenga cu e ta papia y compronde (den e cifra aki poblacion general di Aruba ta inclui). No obstante, danki na comprondemento di e importancia di lenga materno, a alcansa logronan den materia di enseñansa multilingual.
Aña 2025 ta marca e di 25 aniversario di Dia Internacional di Lenga Materno. E punto culminante aki ta enfatisa un cuart siglo di esfuerso dedica na preserva diversidad linguistico y promove uzo di lenga materno.
Esaki ta un oportunidad importante pa reflexiona riba e logronan, renoba compromiso y destaca e papel fundamental cu preservacion di lenga ta desempeña den salvaguardia di patrimonio cultural, mehoracion di resultado den enseñansa y creacion di sociedadnan mas pacifico y sostenibel.
Cu esaki den mente y como motivacion UNESCO Aruba, UNOCA y Biblioteca Nacional Aruba a uni forsa pa celebra Dia Internacional di Lenga Materno 2025 na Aruba, cu organisacion di dos anochi den Biblioteca Nacional Aruba diabierna dia 21 y diaranson dia 26 di februari 2025 cuminsando pa 5:30 or di atardi, cu porta ta habri pa publico.
Den e charla titula “Evolucion y Emancipacion di Papiamento – Di lenga di catibo pa lenga di universidad” cu ta cuminsa pa 6:00 or di atardi en punto Ramon Todd Dandaré Mag. Ling. lo presenta, cu e charla di 2003 como base, un enfoke historico di nos lenga, den cual lo presenta, informacion tocante, entre otro, e siguiente puntonan: origen y evolucion di Papiamento den un constelacion colonial; lenga general di e islanan ABC; rol di e diferente gruponan social; trastorno- y obstaculonan cu mester a vence; lucha pa reconocemento di su propio papiadonan, specificamente den enseñansa y den comunidad en general; y emancipacion di e lenga den tur sorto di expresion: cultural, linguistico, literario, intelectual, artistico, politico y mas.
Tur hende ta bonbini na e dos anochinan aki, di cual sigur sigur nan lo no sali desapunta.
