Mas cu 100 ton di sushi colecta den algun ora di Dia Nacional Ban Cuida Aruba

Accion tabata un gran exito

ORANJESTAD (AAN): Diasabra tabata e gran dia!  Den apenas e prome dos ora di e accion nacional di haci e isla limpi, a colecta casi 43 ton di sushi.

   Ya pa 11’or di mainta e conteo tabata na 74,04 ton di sushi y pa 12:00 pm, a logra sobrepasa e meta di 101,2 ton di sushi colecta. Esaki ta un total di mas cu 61 baki (container) completo di sushi.

   Na un total di 26 punto rond isla, baki pa sushi a wordo poni. Varios di nan a yena completamente den poco tempo. Ekiponan tabata hopi ocupa pa recoge y basha e bakinan pa despues pone nan bek na disposicion di comunidad.

   Gobierno ta haci un yamada na comunidad pa separa sushi debidamente. Tin baki apart pa mata y blachi, palo y palet, carton, tire, metal y resto di construccion manera tegel y beton. Asbestos no ta permiti den e bakinan.

   Comunidad tambe por entrega desperdicio na Zona di Desperidicio Barcadera, na Watertoren di San Nicolas y na e area di Harbor Arena, entrada banda di ex-Bushiri Hotel.

   Diferente instancia y compania a contribui na e organizacion y transmision di e actividad, entre nan Setar, Aruba Ports Authority, WEB Aruba, Post Aruba y CEDE Aruba. E medionan di comunicacion a move nan teamnan pa informa comunidad durante henter e dia.