ORANJESTAD (AAN): Un temblor di intensidad promedio a wordo registra Diasabra merdia net pazuid di isla di Corsou.
Su intensidad a wordo registra na 3.8º riba Scala di Richter, segun Servicio Geologico Colombiano. Tin un tiki inconsistencia, debi cu e agencia na Venezuela a registra esaki na solamente 3.0º di intensidad.
Tabata exactamente 12:18 pm, cu esaki a socede. E epicentro a wordo localiza den lama, esta 11.88º Nort y 68.98º West. Esaki ta apenas 25 km Zuid for di Emmabrug na Punda, capital di Corsou. E ta igual cu 24.1 km Zuid-Zuidwest di Jan Thiel (Corsou), igual cu 33.8 km Zuid di Aeropuerto na Hato (Corsou). E ta igual tambe cu 113 km Zuidoost di Lighthouse di Sero Colorado (Aruba).
Encuanto su profundidad, aki tambe tin discrepancia. E agencia Funvisis di Venezuela ta indica cu e tabata na 35.1 km bao di subsuelo di lama. Pero e agencia SGC di Colombia ta indica cu e tabata menos di 30 km.
