Mas ciudadano ta cayendo pa estafa di un Agencia di Biahe chikito

Hende ta paga pasashi pero Aerolinea no ta ricibi registro

• Hopi hende a entrega keho di estafa caba na Recherche
• Suplica pa mas victima haci denuncia oficial 

ORANJESTAD (AAN): E ta algo cu a bin ta stobando pa algun siman caba na Aruba!  Hendenan cu ta acudi na un Agencia di Biahe chikito situa den Schotlandstraat pa cumpra pasashi sea pa nan mes, of pa sernan keri den exterior, ta bin haya cara abao ora di presenta na Aeropuerto cu nan maletanan, y Aerolinea ta informa nan cu hamas nan a ricibi pago, y tampoco nomber di pasahero no ta ni registra!

   Tin indicacion cu esaki a socede cu casi 100 pasahero local caba cu ta pagando bon placa pa pasashi, y ora di prepara pa nan vuelo, ta keda atras debi cu nan “recibo di pago” y “papel di confirmacion” cu e muher Vivian Johanna Duran Osorio di Avero Travel Agency ta produci, no tin validez na Aeropuerto.

   Pesey varios hende na Colombia ta yega Aeropuerto cu ticket cumpra via e negoshi aki den Schotlandstraat pero ta keda atras sin por subi avion.  Esaki a socede tambe cu hendenan cu a yega na Aeropuerto di Maiquetia na Venezuela.

   Denuncia di victima: Siman pasa un ciudadano a denuncia publicamente na un emisora local, cu el a paga casi 1.000 Florin como 23 dia pasa pa pasashi di un ser keri cu tin di viaha e siman aki di Colombia pa Aruba.  Sinembargo despues di a haci pago, cu el a haya recibo y tambe e papel di supuesto “Confirmed” di e viahe, el a bin tende storia rond di hopi hende ta adverti ciudadanonan pa watchout cu e agencia di biahe aki.  Hasta riba Social Media tabatin hendenan a cuminza adverti otronan cu e muher cu ta atende e negoshi ta estafando hende.

   Esaki a habri wowo di e ciudadano, pensando cu kizas e tambe a cay den e trampa aki.  Pesey el a dicidi Diabierna 4 di October pa acudi na Aeropuerto pa asina check cu e oficina di e aerolinea pa mira si e copia di e ticket cu e tin den su man ta valido of no.  Pa su sorpresa, e aerolinea a indik’e cu nan computer no tin nada di reservacion haci bao di e nomber ey.  Pues nan como compania no a ricibi ni 1 cen di pago di Avero Travel Agency, y tampoco automaticamente no por duna ningun clase di “confirmacion” cu e pasashi ta cla pa wordo usa.

   Pues e pida papel den su man cu ta “Confirmed” e vuelo, tin ningun clase di balor!  E ciudadano e ora a haye ta saca casi mesun suma atrobe pa cumpra un pasashi di berdad, pa asina trece su ser keri for di Colombia, y pa e no keda stagna na Aeropuerto cu ticket sin balor.

   Obliga cumpra pasashi atrobe: Aki por mira con un ciudadano ta haye obliga na gasta mas placa, net den e temporada dificil aki cu prijs di tur cos ta subiendo.  Ademas ta tristo cu pueblo ta traha duro pa haya salario y placa, pero tin hendenan sin cuero di cara ta estafa otro y lagabo asina pega na Aeropuerto na check-in counter sin cu bo tin pasashi valido.

   Hecho ta cu loke ta pasando aki ya no ta un “mal entendimento” cu ta pasando cu asina hopi hende.  E ciudadano ta haci un suplica urgente pa tur esnan cu a bira victima, pa acudi na Recherche pa asina haci denuncia.  Mas hende haci denuncia contra e muher di inicial Vivian Duran Osorio di Avero Travel Agency, ta mas forza Ministerio Publico tin den pa actua.  E estafa aki ta coriendo den miles di Florin, y e muher tin di bay para responsabel pa tur esaki.

   Varios denuncia na Recherche: Un famia a indica cu nan a haci viahe, y e unico pasashi cumpra na e lugar aki den Schotlandstraat tabata pa nan tata di edad grandi.  Nan a yega Aeropuerto y a resulta cu e ticket di e tata no ta valido.  Aki e famia a haya nan obliga na cumpra un pasashi nobo p’e.

   Diferente ciudadano a indica cu nan a acudi caba na Recherche di Oranjestad pa denuncia estafa di riba di 5.000 Florin.  Tambe tin algun cu a bay haci denuncia na Recherche di Santa Cruz di estafa di 1.700 Florin, y tambe na Recherche di Warda di Polis na Shaba.  Un suplica urgente pa mas victima presenta cu tur nan papeleo pa haci denuncia.  Palabra final awor ta keda na Fiscal y Ministerio Publico.

   Un dama a denuncia cu el a bira victima di e muher Vivian Duran aki, ora el a paga balente placa pa bula cu KLM di Aruba pa Amsterdam y despues pa Madrid.  Tur e miles di Florin cu el a paga, aparentemente a desaparece den tas di e muher Vivian di 39 aña di edad.  Ta hopi placa tin envolvi aki, y Vivian mester por ta realizando cu el a comete un scam basta grandi.  E dama mes cu su ticket invalido a keda sin por viaha pa Madrid.

   Lock porta di negoshi: Anto ora hendenan a bay bek furioso na e oficina den Schotlandstraat, nan ta bin mira con Vivian Duran Osorio ta core cera e porta na lock, y keda sin habri porta pa nan.  El a pone papel na porta pa bisa cu hende por yama telefon so, pero no tabata contesta yamada mas.  Diripiente el a hasta delete su pagina riba Facebook, y tambe delete su account riba Instagram.

   Conseho pa tur hende ta cu awendia hopi hende ta cumpra pasashi na forma safe y sigur cu sistema Online.  Tambe corda cu tin hopi Agencia di Biahe bon reconoci, di bon reputacion, y cu ta existi hopi aña caba.  Acudi na nan pa bo ta safe y sigur di bo compra.

   Tin informacion cu e muher Vivian Duran Osorio aki a trata di subi avion y huy di Aruba cu tur e placa, pero a wordo gara door di Grenspolitie.  Sinembargo como cu vocero di Ministerio Publico ta cu vacacion, ningun hende por confirma esaki, pues pa awor e ta djis un rumor.