Balashi Beer Experience ta habri dia 4 di October

Un etapa nobo pa Aruba:

ORANJESTAD (AAN): Despues di casi tres aña di desaroyo intensivo, Balashi Beer Experience Aruba lo habri

su portanan oficialmente riba diaranson, dia 4 di October, na e centro di entretenimiento Gloria Aruba.

   E experiencia nobo ta marca un capitulo importante pa economia turistico di Aruba, cu ta responde na e demanda creciente pa mas atraccion recreativo paden durante oranan di dia. Balashi Beer Experience Aruba ta diseña pa atrae turista cu ta keda na nos isla, pasahero di crucero y habitantenan adulto di Aruba, kende durante añanan largo a sostene e marca di cerbes Balashi.

   Cu su diseño innovativo y envolvente, e atraccion nobo lo ofrece bishitantenan un experiencia unico cu ta celebra e marca iconico di Aruba, su herencia y su conexion cu nos isla. Pa medio di diferente show, ambientenan tematico, proyeccion di video, efectonan special y exhibicionnan interactivo, bishitantenan lo pasa den un tour cu ta trece e historia di Balashi na bida di un forma atractivo y inolvidabel.

   E tour mes ta culmina den un estilo autentico di un rumshop Arubiano, unda huespednan por disfruta di un ambiente cu ta captura e cultura y hospitalidad di Aruba.

   Balashi Flagship Store y Balashi Bar: E experiencia tambe ta inclui un Balashi Flagship Store, cu ta ofrece un seleccion unico di articulo y souvenir exclusivo inspira pa Balashi y e spirito di Aruba. Ademas, bishitantenan por pasa na Balashi Bar, un espacio vibrante y acogedor unda nan por descubri y disfruta di e gama completo di sabornan di Balashi. Tanto Balashi Flagship Store como Balashi Bar ta accesibel pa tur hende. Por bishita ambos lugar independientemente, sin mester cumpra un entrada pa Balashi Beer Experience.

   Creacion di cupo di trabao: Pa por a construi e facilidad aki pega na Gloria Aruba, a traha cu no menos di 15 subcontratista y awo cu e proyecto ta cla a crea 17 cupo di trabao na Balashi Beer Experience. Cada huesped lo dura entre 90 minuut y dos ora di tempo den e atraccion nobo aki, cu ta conta cu 12 zona di experiencia. E lo ta habri di 10:00 am pa 6:45pm. Localnan ta paga $30 y turistanan lo paga $39 pa persona, cu ta inclui dos cerbes bon friu. Pa por reserva bo tour, por subi e website www.balashiexperience.com.

   Un historia cu ta bay mas leu cu cerbes: E historia ta explora kico ta haci e isla chikito aki den Caribe asina distintivo y con generacion tras generacion di creatividad, perseverancia y orguyo local a crea un identidad cu ta unicamente Arubiano. Na centro di e experiencia tin un historia cu ta bay mas leu cu cerbes. E trayectoria di Balashi ta mescla samsam cu e historia di Aruba: su pueblo, cultura, paisahe y e spirito unico di nos isla.

   E tema central ta explora un pregunta interesante: Con un isla chikito den Caribe a logra crea un cerbes cu a bira un parti asina iconico di Aruba? Bishitantenan lo descubri no solamente e historia tras di Balashi, sino tambe e ingredientenan, influencianan, tradicionnan y personanan cu a contribui na formacion di e marca.

   Di e forma aki, e atraccion ta bira tanto un celebracion di Aruba como un experiencia envolvente dedica na cerbes. Den 12 escenario distinto, huespednan lo conoce diferente aspecto di Aruba pa medio di naracion, elementonan interactivo y ambientenan atractivo. For di casnan tradicional di cunucu y nos lama Caribense te na e paisahe robusto di Parke Nacional Arikok, cada escenario ta revela un capa diferente di nos isla y e storianan cu tin tras di dje.

   Inversion importante den Gloria: Balashi Beer Experience ta ocupa un espacio di 1.300 meter cuadra den un ampliacion di Gloria, e compleho di entretenimento na Aruba. E adicion, cu su tanki di cerbes iconico, ta representa un paso importante den evolucion di Gloria como un destinacion principal pa entretenimento. E experiencia ta stimula bishitantenan pa keda mas largo den e compleho, creando sinergia cu negoshinan existente manera The Movies, Starbucks, P.F. Chang’s, Olive Garden y e Food Court.

   Balashi Beer Experience ta un proyecto nobo den e portafolio di MetaCorp. Como compania mas bieu di Aruba, MetaCorp ta sinti orguyoso di crea oportunidadnan cu ta contribui na fortificacion di economia y turismo di nos isla. E compania ta kere firmemente den potencial di Aruba y ta mira e inversion aki como algo cu ta bay mas leu cu simplemente un atraccion nobo. E ta un oportunidad pa crea empleo y sigui enrikece e oferta turistico di Aruba. Pa garantisa un experiencia di nivel mundial, MetaCorp a conta cu e experiencia y conocemento di Sandenburg Experiences, e agencia di diseño di experiencia cu sede na Amsterdam, y otro experiencianan prestigioso di marca.