E Balada di Paladin den e mundo extravagante di politica moderno na Aruba - *Nunca mundo a cuestiona con Paladin a cumpra su cabay y su pistol - *E logro grandi di Marisol pa bini cu su propio partido den un pandemia
ORANJESTAD (AAN) — E serie di pelicula di cowboy “Have Gun will travel” ya pa cincuenta aña ta riba e lista di produccion clasico di television. E Balada di Paladin, te awe ta riba lista di coleccionnan internacional. E titulo “Have gun will travel” a bira mas cu un titulo di un pelicula y “Have Gun will Travel” a bira un forma pa splica cu “tur cos por pasa.”
E serie di pelicula a conoce 250 episodio pero loke nunca mundo a cuestiona tabata, con Paladin a cumpra su cabay y su pistol pa e por a traha pa su clientenan.
Pero esaki tabata di poco importancia den e serie, cu a mantene su popularidad pa e palabranan y e contenido di “Have Gun will travel”.
E palabranan cu a keda graba den historia, a bini originalmente di “Have tuxido, will travel” (esun cu tin bachi smoking, por biaha) pero a habri caminda pa te awe, hende splica cu tin posesion of circumstancia cu ta haci cu tur cos ta bira posibel pa un persona.
Un persona cu ta causa nos curiosidad sigur ta Marisol, cu awe hunto cu Gunn ta den Parlamento di Aruba pa Partido MAS despues cu Marisol no a honra e convenio cu e tin cu Solangel, cu ta bay abogado pa reclama e asiento den Parlamento.
Ora papia di Marisol por papia di uno di e fenomenonan den e mundo politico di Aruba, cu aparentemente na Siglo 21 a drenta un orbita poco diferente for di loke e Arubiano a considera su lucha ora el a cruza spada pa alcansa su Status Aparte.
Por considera mundo politico di Siglo 21 como surgimento di un comedia divino estilo Dante of mester busca un splicacion terenal pa loke ta pasa?
Naturalmente mester atende “asuntonan terenal” cu hopi cautela y mester splica cu aki nos no ta referi na asunto di tereno ni sikiera di madushi of padushi. Ora nos puntra si politica a bira un “divina comedia” of un asunto terenal, nos ta pensa mas tanto riba asunto cu ta di nos mundo aki bou y no di cielo.
Tur cos por pasa na mundo y hopi cos ta pasa sigur den mundo politico di Aruba cu un serie di drama politico increibel cu kier kita tur atencion aparentemente for di asuntonan cu mester di atencion pa crea un futuro nobo pa Aruba, cu aparentemente no ta e meta mas pero un forma pa politiconan alcansa nan meta.
Pa bolbe na “Have Gun will travel” nos ta contempla e figura cu cual Marisol ta deleita publico votador.
Ta bon pa Marisol y tur otro figura politico di Aruba comprende, cu ta deber di prensa pa bay trata na descubri kico tin tras di un politico y kico ta loke e kier logra.
Pa un pais ta realmente democratico, Pueblo sigur mester bay tras di cortina di cada politico y mira kico nan kier logra pa nan mes, pa nan pais y sigur e grupo cu a kere den nan presentacion.
Pa nos comprende loke nan kier logra, nos mester bay mira kico nan a logra pa nan mes y pa pueblo.
Den e carera politico di Marisol ta resalta como logro indiscutibel cu for di 1998 el a logra mantene su mes den politica productivo pa loke ta trata un entrada como Miembro di Parlamento of Ministro.
Marisol ta heredero politico di PPA.
Marisol como Marisol a cuminsa su caminata politico den MEP. Tempo e tabata den MEP, Madushi a haya su brug.
Marisol a cruza brug politico y a bira berde di AVP.
Despues di un situacion di Mohammed Ali den Parlamento cu casi a mira drama di “technical knock out”, Marisol a uni den POR, e partido di Andin Bikker, Otmar Oduber, Alan Howell, entre otro. Tur cos a bay bon y Marisol a reemplasa Otmar Oduber como Ministro di POR, a atende cu cas di Madushi atrobe, pa den un pandemia crea un espectaculo politico nunca bisto den cual el a exigi pa Parlamento kita e derecho di coalicion di POR di tin su Ministro den Gobierno.
Marisol a bay. Marisol a bolbe cu su propio partido den porta di eleccion 2021. Un partido hecho y derecho, inscribi na Camara di Comercio. E logro mas grandi di Marisol pasobra poco hende por tin nan propio partido.
“Have Gun Will Travel”. Un tremendo obra. Te awe ningun hende sa, kende a cumpra e cabay y e pistol di Paladin, e figura central den e serie.
