ORANJESTAD (AAN): Diabierna mainta den sala di parlamento di Aruba a cuminsa cu tratamento di e presupuesto di Pais Aruba pa aña 2021.
Lider di Fraccion di partido MAS señora Marisol Lopez Tromp a enfoca riba e preocupacionnan cu tin den pueblo pa loke ta personal den e departamentonan di gobierno. Ora sra Lopez Tromp a yega trabao mainta, el a worde enfrenta cu un grupo di werksters hopi preocupa cu nan lo por perde nan trabao.
E parlamentario a scucha tur nan preocupacionnan y a cumpli cu nan peticion pa papia den nan nomber durante e reunion di parlamento.
Presidente di parlamento a cera e lista di orador mientras cu varios miembro di parlamento tabata scuchando e grupo preocupa dilanti edificio di parlamento, cual ta algo di lamenta.
Sra Lopez Tromp den su disertacion durante prome tanda, a haci pregunta riba e asunto di personal y riba e presupuesto di pais Aruba, mirando e hecho cu Minister Presidente a firma pa un landspakket aña pasa pero cu e no ta mira esaki refleha den e presupuesto back. Tambe a haci pregunta riba varios preocupacion den nos comunidad, manera e parti di medio ambiente, nos muchanan, abuso sexual y kico gobierno ta bay haci pa combati esaki.
Fraccion di MAS a dedica atencion na tematica di e ley cu ta encera e reparticion di cartera di e diferente ministerionan, mirando cu no tin claridad ainda y no por exclui cu Formador lo bay aumenta e cantidad di ministernan na 8 of 9. Esaki door cu den e formacion solamente tin 2 partido en bes di 3 manera tabatin gobernacion ultimo.
Sra Lopez Tromp a finalisa bisando cu no por ta asina cu riba pueblo ta worde corta y gobierno na su turno ta amplia ministerio .
