ORANJESTAD (AAN): Mariniernan Mericano lo bay tin training na Aruba! Desde awe Diasabra 5 di Juni, e ehercicio yama ‘Caribbean Coastal Warrior’ ta cuminza.
Den e ehercicio anual aki, e 30 mariniernan di United States Marine Corps (USMC) lo entrena hunto cu mariniernan Hulandes di e Marine Squadron Carib. E training lo sigui te dia 4 di Juli 2021.
E cooperacion militar entre Merca y Hulanda ta uno estrecho. E marineronan di USMC y Mariniers Hulandes ta considera nan mes como socionan permanente. Marineronan Mericano di e 2nd Reconnaissance Battalion sa haci training regularmente na Aruba. A cambio di esey, e mariniernan di e Marine Squadron Carib (antes yama 32 Raiding Squadron) tambe ta bay train tur aña na Merca. Esey a caba di socede na Maart cu a pasa.
Caribbean Coastal Warrior ta un ehercicio cu ta centraliza principalmente riba actividadnan di buceo. Asina scubadivers for di Hulanda ta bin participa na e training. Nan lo bay realiza hunto cu e Mericanonan, varios duikmento di calificacion y certificacion.
Mariniers Hulandes lo bay suministra instructornan di buceo, unda ta bay traha hunto cu US Marines pa harmoniza e procedimento di scuba diving. Esaki mester mehora e eficacia di e operacionnan conhunto.
Traininghub: E awanan rond di Aruba ta pa tur dos unidad di Mariniers, un lugar hopi adecuado pa training. Cu e combinacion di temperatura di awa y e claridad, y sosten logistico di Marinierskazerne Savaneta, e condicionnan ta optimal pa un training eficaz y exitoso.
Caribbean Coastal Warrior ta fit den e ambicionnan di Defensa Hulandes den Caribe pa posiciona su mes (internacionalmente) mas como un centro di entrenamento militar, tanto riba tera como den awa.
DIARIO a compronde, cu e Mariniernan di USMC cu ta bin Aruba, lo bay tene nan mes na tur protocol y regla sanitario imponi pa controla Covid-19 na Aruba. Pesey prome cu nan a sali di Merca a haci un test cu nan.
