ORANJESTAD (AAN): E reclamonan cu por a tende for di tur skina despues di e 1er debate di Camara di Comercio, no tabata duna e evento un aceptacion abrumador.
“Un debate sin sauce,” ta loke algun hende a describi e Debate Electoral 2021 cu a pasa Diahuebs 3 di Juni via Telearuba y social media.
Publico mes a cuminza expresa, cu loke nan a mira tabata djis un show di ‘Entrevista’ estilo di pregunta y contesta. Nada di pone politiconan reacciona riba otro, ni nada.
DIARIO a compronde cu hasta riba e mesun pagina di Camara di Comercio mes tabatin publico cu tabata expresa nan disgusto pa e formato aki cu ta parce no a yuda cu nada pa esnan interesa pa haya sa kico e 12 partidonan tin pa ofrece den gobernacion.
Por a nota hopi hende cu no a gusta e forma cu e moderador Yolanda Richardson a carga e debate. Varios persona a mustra riba erornan haci, pero aki kizas tin di pensa cu e sosten di e organizadornan pa cu e moderador a stagna formal, pasobra dado momento e moderador den prome tanda a hasta perde e randomizer cu a yuda trek lot pa kende ta contesta.
E moderador Yolanda Richardson ta duna les na Universidad di Aruba, unda e ta duna les den debate y sa hopi di e materia.
Recientemente durante un conferencia di prensa, Martijn Balkestein cu ta den e Comision Organizador, a bisa cu despues di e prome debate, ta evalua kico tabata e puntonan exitoso, y kizas haci cambio na algun di e puntonan ey.
Aki ta unda cu Balkestein a subraya, cu e di dos debate di 17 di Juni lo no ta mescos cu esun prome, y posiblemente lo bin cu un otro formato. Toch nan ta keda habri pa cualkier sugerencia di organizacionnan local y ciudadanonan cu por duna nan un bista riba kico kizas tin di cambia.
E 60 seconde di tempo:
E pregunta a wordo haci siman pasa caba na Balkestein, si acaso 1 minuut di tempo ta suficiente pa un politico duna su contesta riba e materianan. El a bisa cu depende con complica e pregunta ta, lo por duna sea 1 of 2 minuut di tempo pa contesta.
Pero si acaso e lider politico ta agil y suficiente na altura di e topico, e por duna un contesta cu ta indica den cua direccion bo ta kere e pais tin di bay. No ta intencion pa e lider bay den detaye, pero por lo menos e mester tin su ideanan caba.
Sinembargo Diahuebs anochi, publico en general a comenta cu 60 seconde aki ta demasiado cortico.
