Marina Hulandes a yuda captura casi 2 ton di cocaina cerca islanan ABC

Por lesa e relato di Hulanda y esun di Merca

ORANJESTAD (AAN): E siman aki na mesun momento, dos partner den Caribe cu ta combati narcotrafico, a divulga na mesun momento di un captura cu nan a haci como 3 siman pasa.

   Defensa di Caribe Hulandes, como tambe US Coast Guard a revela na mesun momento, cu nan a logra di intercepta casi 2 ton di cocaina den lama Caribe.

   Version di Hulanda: Segun Defensa Hulandes, tabata Diahuebs 16 di Mei 2024, cu e barco Zr.Ms. Groningen a intercepta un cargamento di droga di casi 2 ton den Region Caribense.

   Ta un avion di patruyahe di Wardacosta di Caribe Hulandes, a detecta un speedboat tipo Go-Fast ta moviendo riba Lama Caribe, y mesora a notifica e barco Zr.Ms. Groningen pa bay den accion, y a sali rumbo pa intercepta e trayectoria cu e Go-Fast ta tumando.

   Despues nan a lansa e Helicopter Mericano y su botonan rapido di intercepcion cu tin abordo di e Squadron di Flota di Marina y LEDET (Law Enforcement Dog Encounters Training) di US Coast Guard.

   Ora cu e tripulantenan di e Go-Fast a ripara cu nan a wordo detecta, nan no a entrega nan mes sin mas.  Nan a djis sigui move y no tabatin intencion di stop.  Nan a stop pofin, despues cu autoridad a cuminsa tira riba e botornan di boto.  E ora nan a stop, y tur cuatro persona abordo a hisa man den halto.  Abordo a bin haya monton di bulto.  Tur a wordo hiba pa barco Hulandes, y por mira nan riba e potret aki net dilanti e Helicopter.  Informacion Hulandes ta cu e droga a wordo entrega na US Coast Guard, hunto cu e cuatro detenidonan.

   Zr.Ms. Groningen ta activo atrobe desde April 2024 den Region Caribe.  Esaki ta e di tres transporte di droga cu nan a intercepta.

   Version di Merca: US Coast Guard a confisca 4.800 liber di cocaina net dilanti costanan di Venezuela den un golpi fuerte contra narcotrafico.  E droga aki cu balor riba caya di 63 miyon Dollar, a wordo hiba na tera na Port Everglades na Fort Lauderdale.

   Nan a indica cu e droga aki a wordo confisca den dos operacion diferente cu a ser haci hunto cu cutternan di US Coast Guard, y esnan di Marina Hulandes, cu a ser haci varios miya panort di e ciudad di Puerto Cabello na Venezuela.

   Lama na parti Noordwest di Venezuela a bira awor un di e principal ruta di droga cu ta sali di Venezuela rumbo pa Merca, den operacionnan controla door di integrantenan di Cartel de Los Soles.  Segun e relato, e Cartel aki domina pa figuranan halto di regimen di Caracas, e cartel a converti Venezuela den un trampolin importante di manda cocaina rumbo pa Europa y pa Merca, di cual e volumen segun calculonan di experto, ta entre 250 pa 350 ton pa aña.

   US Coast Guard a suministra e potret di nan oficialnan fuertemente arma ta cuidando e droga ora di baha esaki na waf na Florida.