Minister Ursell Arends:
*E mal holo a bira un dolor di cabes!
ORANJESTAD (AAN)—Minister Ursell Arends, titular di Transporte, Integridad, Medio Ambiente y Asunto di Adultonan Mayor, den entrevista cu DIARIO a elabora tocante e tema di cambio climatico y e biento cu ta plama e holo di dump cu a bira un dolor di cabes.
Minister Arends a bisa cu gobierno ta trahando cu varios instancia y a sostene e prome reunion caba, pa loke ta trata e ola di calor cu ta sutando mundo henter, y na Aruba no por para keto sino cu mester prepara pa esaki.
“Specialmente mirando cu e ta afecta nos adultonan mayor, y pesey atravez di e Ministerio di Adultonan Mayor, nos a cuminza atende cu e tema aki tambe di e calor cu ta haci e ultimo dianan”, e mandatario a bisa.
El a menciona cu e dianan aki, door di tanto calor, hopi adulto mayor ta drenta hospital y mester ta prepara, mirando cu nan ta nifica 26% di nos poblacion, y mester zorg pa tin tur e tools necesario, e guia y informacion pa por surpasa e situacion.
MAL HOLO DUMP:
E mandatario a sigui cu e tema di mal holo emana for di e dump di Parkietenbos, y a splica cu e ta hayando keho y varios remarca di e vecindarionan di Bucutiweg, Parkietenbos y Simeon Antonio en general, cu e holo ta afecta nan.
“Loke mi por bisa, pa loke ta e tema di e dump di Parkietenbos mes, ya caba e destaho publico a tuma lugar. E compania cu ta bay traha e muraya lo haci esaki dentro di poco, y tambe e proyecto cu nos ta encaminando hunto cu un Instituto Hulandes, tambe ta casi den su etapa final, pa asina aki nos por continua cu e problematica di asbesto, cu tin riba e dump di Parkietenbos y tambe cuminza e capping pa comberti esaki den un panel solar y esaki ta bay den fase manera e compania Hulandes ta aconseha”, Minister Arends a señala.
