Janely Nicolaas, directora di Centro Kibrahacha
ORANJESTAD (AAN): Centro Kibracha diadomingo awo 2 di November, tin nan famoso bazaar pa recauda fondo. E bazaar lo cuminsa di 10:00 am pa 5:00 pm na nan centro na Piedra Plat. Señora Janely Nicolas a informa DIARIO cu e meta principal ta pa sigui organisa actividadnan pa nan clientenan. Entre otro lo ta bendiendo mata, articulonan di bisti, tas, articulonan di cushina, di cas. Tambe lo tin cuminda, cos dushi y snacks. Tin stoel y mesa disponibel pa bishitantenan sinta come mientras ta disfruta di dushi ambiente di musica live di diferente conhunto.
Na Centro Kibrahacha, clientenan ta traha obra di man y esakinan tambe lo ta na benta. Live painting tampoco ta keda afo. Dirigentenan di Club Kibrahacha e dia aki lo ta bay bisti na blauw y por acerca nan libremente pa cualkier pregunta of informacion. Telefoon pa Adulto Mayor 125 tambe lo tin un tent pa brinda informacion.
Entrada na e bazaar di Centro Kibrahacha diadomingo awo ta 1 florin pa persona y esaki ta mara na un premio. Ainda e club ta ricibi donacionnan di mata y articulonan. Y pa haci donacion di placa, por contacta e club directamente. Tur hende ta bon bini.
