ORANJESTAD (AAN): Diahuebs anochi, hopi hende na Aruba por a mira bolitanan di candela ta moviendo di Noordwest rumbo pa Zuidwest di Aruba.
A resulta cu e lanzamento di e raket di SpaceX Starship no a bay bon riba su di siete vuelo di test, y esaki a explota durante lanzamento for di e pad di lanzamento na Starbase, cu ta situa na Boca Chica Beach, cu ta como 20 miya pariba di Brownsville, na Texas.
Algo a bay completamente malo, y e Starship a explota, y tur restonan na candela a keda zweef bay den mesun direccion zuidoost.
E fragmentonan den cielo tabata visibel zuidwest di Florida, y tambe riba mayoria pais den Caribe, incluyendo Aruba.
E explosion a sosede menos di 10 minuut despues di e lanzamento for di Texas. Den un fraccion di seconde, miyones di Dollar a bay perdi. E Starship mes tin un costo di como 100 miyon Dollar pa construi. E costo pa cada lanzamento ta di como 10 miyon Dollar.
Starship ta un nave espacial, cu riba su mes por regresa y ateriza bek na un pad special pa aterizahe.
