Parlamento a laba man manera Pontius Pilatus
- Parlamentarionan no ta compronde ni Hulandes basico
ORANJESTAD (AAN): Jayburtt Dijkhoff a dirigi na Ministerio Publico, pa entrega un denuncia contra Minister di Salud Publico, señora Mervin Wyatt-Ras, y esaki ta su declaracion pa prensa.
“Cu duele na mi curazon a yega momento cu mi mester a entrega un denuncia contra Minister Mervin Wyatt-Ras, pa motibo cu a yega na e punto cu no tin control mas di parti di gobierno. Ultimamente, e Vicepresidente di Parlamento a contesta mi tambe publicamente, cu nan no ta bay contesta mi carta, cu basicamente nan ta referi mi na Ministerio Publico, si mi tin acusacionnan, y asina laba man manera Pontius Pilatus, y esaki ta algo hopi tristo pasobra mi ta bisa basicamente, cu e Trias Politica cu nos tin na Aruba no ta funciona. Parlamento y Gobierno ta un. E famoso stempel parliament a wordo comproba, y basicamente mi ta puntra mi mes tambe, si e parlamentarionan ta compronde si, kico nan ta lesa”, Jayburtt Dijkhoff ta señala.
El a agrega cu e carta cu el a manda no ta bay riba e acusacionnan, pero ta bay riba e pregunta si ta ok, si un minister no ta cumpli cu ley, den e caso aki e “Landsverordening Openbaarheid van Bestuur” cu den tres siman e mester contesta cualkier ciudadano.
“E ta bisa cu e no ta bay haci’e. Mi ta puntra Parlamento ki señal nan ta pensa cu esaki ta duna pa pueblo, y kico ta e contesta? Cu nan no por bay haci ningun clase di investigacion. E ta mustra cu Parlamento ta incapacita pa guia e pais aki; nan no ta ni compronde Hulandes basico, mi hasta ta puntra mi mes kico nan a bay haci na Hulanda, cu full e discusion aki di HOFA sin cu nan ta compronde den tur e stuknan aki? E ta sumamente peligroso y alarmante pa pueblo y cumpliendo tambe cu deber como ambtenaar, cu e forzanan democratico a faya, mi a dicidi como persona y como ambtenaar, entrega un aangifte awe na Ministerio Publico”, Jayburtt Dijkhoff a reitera.
