Mama sin consuelo mustrando e ultimo potret di DJ Louisville

ORANJESTAD (AAN): Su sala di cas ta decora cu dos fabuloso diseño cu su yiu homber Luis Angel Figueroa Flores tabata promove su mes.

   Di e forma ey señora Anahixa Flores ta honrando memoria di su yiu kende siman pasa Diadomingo anochi a perde su bida tragicamente na rand di parkinglot di Paseo Herencia.

   Su yiu homber tabata usando e nomber artistico DJ Louisville y den un poco tempo a bira hopi popular, tocando na varios empresa local pa entretene publico.

   E atardi ey prome cu el a perde su bida, e tabata tocando na YOLO cu ta situa den The Cove Mall na Palm Beach.

   Señora Anahixa a mustra e ultimo potret, saca e Diadomingo atardi ey pa 5:00 pm tocando na YOLO.  Un potret unda bo ta mira Luis Angel Figueroa Flores ta concentrando y tocando riba un DJ Console di marca Pioneer den e establecimento.

   E señora a pone mannan riba e potret y a keda mire, y na final a bisa: “Mi tin dos yiu so, un mucha muher y un mucha homber, y nan a kitami mitar di mi bida cu esaki.”

   Como cu e famia ta sigur cu tin hende cu sa kico a pasa exactamente, el a manda un mensahe final: “Mi ta pidi por fabor na e persona cu por sa, of e persona cu a haci esaki, mi ta rogabo y suplicabo pa papia!  Bisa si ta un accidente of e ta un asesinato.”

   El a bisa esey, pasobra pa Luis Angel, no tin motibo, djis no tin motibo pa su bida caba asina.

   Esnan cu kier yuda autoridad, por yama Tipline di Polis na 111-41.  Corda cu nan ta garantiza cu bo ta keda anonimo.