ORANJESTAD (AAN) – CEO di ATA, Ronella Croes a comenta den conferencia di prensa, cu tambe ta interesante pa ilustra con Aruba ta compara cu Caribe.
El a señala cu segun KB Tourism Organization, y si tuma e destinacionnan cu a raporta nan resultadonan di Januari te cu Augustus, di e aña aki, Aruba tin e grado di mehoracion mas fuerte den Caribe na e momentonan aki.
E ta mustra un crecemento di 96% compara cu e mesun periodo na 2020, sigui pa Sint Maarten y Republica Dominicana. Tur otro destinacion den e area aki ta mirando un grado di crecemento, compara cu 2020, hopi mas abao.
El a reitera cu esaki ta e destinacionnan cu a raporta nan resultadonan for di Januari te cu Augustus. El señala cu lo por tin otro destinacionnan tambe, cu ta moviendo hopi fuerte, aunke no ta hopi. Nan resultadonan no ta inclui den e informe aki, pasobra nan no a wordo raporta.
“Locual nos ta mira sigur, ta cu tiki tiki otro destinacionnan ta bin bek tambe, y podise e competencia lo ta hopi mas fuerte cu nunca pa gana e biaheronan potencial, y ATA, sigur, ta prepara pa esaki, anticipando pues cu e competencia lo ta sumamente fuerte pa pusha e temporada halto, cu ta na caminda y e recuperacion na 2022”, Croes a menciona.
ATA ta conciente cu semper tin hopi discusion, entre otro, riba e diferente medidanan, entre otro di parti di sector priva. Algun ta di acuerdo, otronan no, y sigur tur ta pidi pa mas control y pasonan pa esnan cu no ta cumpli cu e rekisitonan.
Ronella Croes a expresa cu ta bon pa reflexiona riba e hecho cu autoridadnan cu ta controla of tuma pasonan, no por yega na tur establecimento comercial. “Esaki ta un hecho. Pues den e afan di normaliza gradualmente, y realiza cu covid tey pa keda, ta pensa riba e responsabilidad cu cada individuo y negoshinan mester carga. Bisando esaki, si, nos ta compronde e ponencia di comerciantenan uni, entre otro, cu ta señala cu no tin un solucion pa cu situacionnan unda cu tin negoshi cu no ta atene cu medidanan vs otronan cu si ta haci esaki”, Ronella Croes a bisa.
El a agrega cu mester tin comprension pa esaki pero tambe mester tin comprension pa cualkier medida cu mester wordo implementa; y mester tin control, pero simplemente cualkier maneho cu tin, nunca por garantiza esaki 100 porciento, pasobra basicamente e no ta ni practico ni posible.
“Tambe mi ta subraya cu no obstante cu Covid-19 tey pa keda, y ta trata di normaliza gradualmente, ainda nos ta den e crisis. Di mi banda mi a ilustra con algun pais for di unda nos mester ricibi bishitante tin nos riba nivel di riesgo halto ainda. Esaki mi ta comparti como ehemplo y asina tin mas punto pa considera, prome cu haci cambionan den medidanan y den estrategia total. Ainda nos mester keda skerpi, no obstante diferencia di opinion y kizas frustracion pa cu medida y e situacion, etc. Nos mester enfoca riba e meta comun, cu ta recuperacion economico, basicamente mas rapido posible y esaki ATA ta sigui haci”, CEO Ronella Croes, a conclui.
