Magic FM y Discovery Travel haciendo soño di wela bira realidad

Studiante ta pasa ‘Pasco na Cas’

ORANJESTAD (AAN): E siman aki, e emisora local Magic FM a anuncia cu nan a haci entrega oficial di e premio principal di su campaña “Pasco na Cas”, un iniciativa di e emisora cu e meta pa reuni famianan Arubiano durante e dianan di fiesta. E proyecto tabata un idea original di Magic FM, y Discovery Travel a uni hunto cu hopi agrado pa celebra asina su 34 aniversario na un manera cu ta duna hopi balor na comunidad.

  E ganador afortuna ta Sofia, e wela di Kevin Florencio, un studiante hoben Arubiano cu ta residencia na Amsterdam. Awo Kevin por bin Aruba pa celebra Pasco y Año Nobo hunto cu su famia, danki na un voucher di 3.500 Florin pa pasashi aereo, ofreci pa Discovery Travel y Magic FM como premio principal di e sorteo.

   E entrega a tuma lugar ora cu Rob y Mary Spellen, doñonan di Discovery Travel, hunto cu Erin Croes, director y personalidad principal di radio Magic FM, a entrega e voucher na Janine Figaroa, mama di Kevin, den un ambiente di hopi emocion y gratitud.

   E chens den e sorteo tabata danki originalmente na Sofia, wela di Kevin, kende a yama durante e programa Pasco Encanta riba Magic FM. Su deseo sincero tabata pa su nieto bin pa e dianan di fiesta y awo esaki a bira realidad.

   Magic FM y Discovery Travel ta expresa nan felicidad profundo pa por laga un famia Arubiano reuni den e temporada di amor, paz y union. Esaki ta refleha kico ta posibel ora medio y empresa local uni forsa pa trece alegria den comunidad. Magic FM ta gradici tur oyente cu a participa den e campaña Pasco na Cas y ta desea tur famia Arubiano un Pasco bendiciona.