ORANJESTAD (AAN): Copa Mundial ta den cuminza, y e emisora Magic FM ta prepara pa lansa loke lo ta, sin duda,
e cobertura di futbol mas ambicioso, mas completo y mas dinamico den historia di e emisora. Durante añanan, Magic FM a comproba cu e ta e estacion di radio cu por crea e ambiente di futbol mas grandi na Aruba, y pa Mundial 2026 e compromiso ta pa supera tur expectativa.
Na centro di e cobertura lo ta e legendario narador Cadochi Kock, kende pa añanan a logra capta e emocion, intensidad y magia di futbol den un estilo unico cu ya ta forma parti di memoria colectivo di hopi aficionado di deporte na Aruba. Hunto cu ne lo ta comentando e panelista Devin de Veer, cu su amplio conocemento di futbol internacional y capacidad di analiza e wega, cual ta agrega profundidad na cada transmision. E ekipo ta complementa cu analisisnan profesional y perspectiva tecnico di Arianne Westerburger, brindando oyentenan un comprension mas profundo di tactica, rendimiento y desaroyo di e campeonato.
Tras di e micnan tin un ekipo tecnico solido cu ta haci tur esaki posibel. Trevor Rosel, Allen Rafael y Reno Irausquin ta trahando arduamente pa garantiza calidad excepcional den produccion, transmision y contenido multimedia. Tur esaki bou di liderazgo di e semper dinamico director Erin Croes, kende ta sigui impulsando innovacion y excelencia den cobertura deportivo na Aruba.
“Nos meta ta pa haci cu cada oyente sinti manera cu ta nan mes ta presente den Mundial,” segun directora Erin Croes di e emisora. “Futbol ta pasion, emocion y comunidad, y nos kier comparti esey cu henter Aruba.”
