Magic FM ta drenta un era nobo cu inversion den tecnologia y calidad di transmision

ORANJESTAD (AAN): Despues di un cobertura exitoso di Mundial 2026, Magic 96.5 FM ta anuncia un era nobo den su desaroyo,

cu inversionnan importante den ekipo moderno, instalacionnan tecnico y mehoracion di su señal tanto riba FM como via streaming online.

Durante e ultimo aña, Magic FM a implementa varios cambio den su infrastructura tecnico. E proceso aki ta forma parti di e compromiso continuo di gerencia pa mantene e nivel di e emisora y sigui ofrece su oyentenan un producto moderno, confiabel y di calidad halto.

Radio ta sigui ocupa un lugar importante den bida diario na Aruba. Apesar di e cantidad grandi di opcionnan disponibel, miles di persona ta sigui scucha noticia, entretenimento y musica local na nan emisora preferi. Funda na 1998, Magic FM a logra establece su mes como un di e stacionnan cu un posicion importante y cu un sintonia diario fuerte tanto na Aruba como den exterior.

Entre e mehoracionnan cu a realisa ta e traslado di e camber di transmision pa un instalacion nobo na Hooiberg, cambio di e tubonan, renobacion di e sistema STL y adkisicion di un sistema di automatizacion actualisa, hunto cu computernan nobo.

Ademas, Magic FM a inverti den procesadornan nobo pa zonido y microfon, cu instalacion ta programa pa e siman aki. E ekiponan lo contribui na un calidad di audio superior tanto On Air como riba e plataformanan di streaming. Personal di Magic FM tambe lo pasa den un proceso di entrenamento pa por maneha e sistema automatisa nobo optimalmente.

E inversionnan aki ta resultado di e conocemento y inspiracion cu gerencia y miembronan di e team a adkiri durante nan bishita na NAB Show 2025 na Las Vegas, Nevada, considera e convencion di media y tecnologia di transmision mas grandi na mundo.

“Mi ta convenci cu e inversionnan realisa ta sumamente necesario pa mantene nos nivel y ofrece mas calidad na nos oyentenan, tanto riba FM como via streaming online. Ta door di sigui innova y mehora cu un emisora por sigui crece,” director di Magic FM, Erin Croes, a comenta.

Pareu cu e renobacion tecnico, Magic FM ta trahando tambe riba un upgrade di su presencia online, pa fortalece e conexion cu su audiencia local y internacional.

Gerencia di Magic FM ta expresa su profundo gratitud na e team completo, cu diariamente ta sigui duna lo miho di nan pa mantene e emisora stima, dinamico y cerca di su oyentenan. Tambe ta expresa un danki di curazon na henter su audiencia y tur e clientenan comercial cu ta scoge y sostene Magic FM tur dia.

Cu e siguiente fase di instalacion y entrenamento na caminda, Magic 96.5 FM ta cla pa habri un capitulo nobo den su historia: un era di mas calidad, innovacion y crecemento.