Ekipo di DOW ta traha tur dia cu dedicacion y ta cla pa “Dia pa Cuida Aruba”

Prome Minister Eman

ORANJESTAD (AAN): Dialuna mainta siman a habri cu Prome Minister Mike Eman a reuni cu diferente ploeg y e trahadornan di Departamento di Obra Publico (DOW), cu diariamente ta encarga cu limpiesa di canto di caminda y mantencion di infrastructura publico.

Durante su discurso, Eman a expresa su gratitud pa e dedicacion y esfuerso cu e trahadornan ta mustra tur dia. El a reconoce cu tene Aruba limpi no ta un tarea facil, particularmente despues di cu dump a cera, locual a contribui na un aumento di dumpnan ilegal di sushi den diferente bario y area.

“E situacion aki a haci boso trabou hasta dos biaha mas dificil,” Eman a expresa, gradiciendo e trahadornan cu, bou di solo cayente, ta sali tur dia pa atende cu e peticionnan di comunidad y haci e lugarnan afecta. Segun Prome Minister, e zona nobo pa entrega desperdicio ya a ricibi casi 3 mil pickup, mientras cu Gobierno tin intencion di habri mas zona asina. E meta ta pa pocopoco e trahadornan di DOW por bolbe concentra mas riba nan otro tareanan regular, manera corta yerba, mantene canto di caminda y cuida diferente espacio publico. Durante e encuentro, Mike Eman tambe a haci un apelacion na e empleadonan di DOW pa participa boluntariamente den e gran actividad nacional “Dia pa Cuida Aruba”, cu lo tuma luga diasabra 25 di juli awor. Pa e dia ey lo tin mas cu 26 punto cu baki y diferente ploeg lo wordo asigna na area specifico, incluyendo sitio caminda tin hopi sushi of unda tin dump ilegal a wordo reporta. DOW lo coordina cu e trahadornan pa nan haya claridad tocante e horario, e area y e tarea cu cada ploeg lo ehecuta.

Eman a enfatisa cu participacion no ta obligatorio, pero cu ta un apelacion di curason pa tur hende uni forsa. Diferente instancia, compania di Gobierno, contratista y otro organisacion tambe lo aporta material, baki y otro sosten necesario pa haci e actividad un exito. Prome Minister a splica cu e iniciativa no ta solamente un dia pa haci limpi. P’esey e actividad a haya e nomber “Dia pa Cuida Aruba”. “Aruba ta di nos. Dios a duna nos e suelo aki y ta responsabilidad di nos tur pa cuid’e. Boso ta haci boso parti, pero comunidad tambe mester haci su parti,” Eman a bisa.

E meta ta crea mas concientisacion den comunidad, pa e habitantenan no sigui tira sushi despues cu un area ta limpi bek. Si e iniciativa resulta exitoso, Gobierno kier sigui cu mas proyecto comunitario, manera drecha bario, scol y cancha deportivo, y planta mata den diferente area.

Na final di su discurso, Mike Eman a bolbe gradici e trahadornan di DOW pa nan perseverancia. Tambe el a indica cu lo tin mas reunion den futuro pa papia tocante e contractnan, e condicionnan di trabou y diferente idea nobo pa sigui mehora e situacion di e personal. “Nos tur mester pone man y sali hunto. Nos mester uni como pueblo pa cuida loke ta di nos,” Prome Minister a conclui.