Maestronan nobo di SKOA a ricibi training con pa duna educacion sexual na scol:

Casonan di embarazo hubenil a aumenta

ORANJESTAD (AAN): Diahuebs atardi a haci entrega di certificadonan relaciona cu e trayecto ‘Biba Amor’.

Monique Giel Labad di Wit Gele Kruis a splica cu riba peticion di scolnan di SKOA a duna e curso na maestronan nobo cu mester a wordo educa riba e parti di con pa duna educacion sexual den 5de y 6de klas.

Labad a splica cu e extra trayecto aki a cuminza na October y a bay den fase.

E prome cos cu a maestronan a haya tabata e instruccionnan con pa prepara e les cu tin duna e muchanan y kico tin cu tene cuenta cune.

“Ora cu e maestronan a haya 1 siman di e lesnan di Biba Amor, nan tin cu implement'e”.

Prome cu esaki e muchanan mester a yena un lista di pregunta pa wak kico nan sa y kico nan no sa di e tema y despues nan ta haya e lesnan dentro di 6 siman, segun Labad.

El a sigui bisa cu durante e 6 simannan e maestronan mester a cuminza duna lesnan di educacion sexual na nan alumnonan, entre otro riba cambionan di curpa, pasobra den practica ora cu e muchanan wordo trata, ta resulta cu nan no tin ningun conocimento riba e cambionan di curpa cu ta tumando lugar.

Segun Labad, e experto di Corsow Pharetza Bertad-Damon a bay observa con e lesnan tabata wordo duna.

“Importante ta cu nos por a wak si e lesnan tabata wordo duna na un nivel cu e muchanan por a compronde”.

Despues nos ta haci e ‘nameting’, pa wak kico e muchanan a compronde y kico nan no a compronde di e les, pa despues analiza esaki y traha un rapport, segun Labad.

El a indica cu e tipo di lesnan aki ta hopi importante, mirando cu embarazo hubenil a aumenta bastante.

Segun Labad, for di Februari te cu Mei un cantidad di mucha muher di 13, 14 y 15 aña cu ta na estado, a meld na Wit Gele Kruis.