Joran Van der Sloot lo wordo extradita pa Merca for di Peru

Gobierno di Peru a fia Joran pa Merca procesa su delitonan

PERU: Joran van der Sloot ta e ultimo persona cu lo a wak e hoben mericano di 18 aña di edad, Natalee Holloway aki na Aruba na aña 2005, prome cu su desaparicion.

            Actualmente, Joran ta cera den prison na Peru unda el a wordo condena na un castigo di 28 aña (te cu 10 di Juni 2038), pa e homicidio di Stephany Flores Ramirez na 2010, na ken a conoce na un casino pa despues hib'e den su camber di hotel pa horta for di dje y chok'e mata pa locual a dicidi di huy rumbo Chile, pais for di unda el a wordo expulsa y manda bek pa Peru.

             Relaciona cu e delito aki, asina cu e cumpli cu e condena den e prison di Challapalca, Joran lo mester wordo expulsa for di Peru. Di mesun forma e lo mester paga 200 mil soles na e famia di e mucha muher.    

            Pero awor e tin cu bay rindi cuenta na Merca relaciona cu delitonan di extorsion y estafa contra Elizabeth Ann Holloway (conoci na Aruba como Beth Holloway), mama di Natalee, a cambio di revela unda por a haya e curpa di Natalee.

            Despues di a haya locual Joran a pidi, el a manda un email bek den cual el nenga tur cos.

            Gobierno di Peru awor a bay di acuerdo cu entrega Joran temporalmente despues di e peticion di Merca pa asina por proces'e pa de delitonan menciona.

            E decision aki a wordo tuma den Conseho di Minister di Peru diaranson ultimo.

            Natalee Holloway a wordo mira pa ultimo biaha, marduga di 30 di Mei 2005, ora e tabata saliendo for di un nightclub cu Joran van der Sloot y otro dos homber. Te cu awor, niun hende a wordo acusa di su desaparicion.