Shinouska Albertus, Coordinador:
ORANJESTAD (AAN)—Señora Shinouska Albertus, Coordinador di e Leerwerktraject (LVT), a hiba palabra durante e conferencia di prensa yama pa Minister di Enseñanza, Endy Croes.
El a splica cu LVT ta pa hobennan den edad di 17 pa 25 aña, cu pa un of otro motibo no a logra di caba nan estudio secundario.
Pa e motibo aki LVT tin tres aspecto: e parti educativo unda cu e alumno ta bin les tres biaha pa siman, y esaki ta tuma lugar na EPB Hato, di 3 or di atardi pa e opleidingnan cu nan ta ofrece ta Conocimento Basico di Mantencion, y Conocemento Basico di Beyeza.
Na di dos lugar tin e aspecto laboral unda e hoben ta bay core stage na e compania apunta. Esaki lo sosode e dos otro dianan den siman, pa 8 ora pa dia. Y pa ultimo, tin e aspecto social, unda e hobennan aki ta haya guia den grupo, pero tambe individual.
E acogida pa e Leerwerktraject ta hopi grandi. E aplicacionnan a cuminza, pues pa esnan cu ta interesa por subi e website www.oaa.aw. Aki nan por aplica pa e opleidingnan di Leerwerktraject, y tambe pa esnan di OAA. Inscripcionnan ta tumando lugar y e ultimo fecha ta dia 10 di October proximo.
